නවදිල්ලියේ සමගාමීව පිළිගත් දූත මණ්ඩල සමග සම්බන්ධ වීම තවදුරටත් පුළුල් කරමින්, ඉන්දියාවේ ශ්‍රී ලංකා මහ කොමසාරිස් මිලින්ද මොරගොඩ මහතා වාණිජ රාජ්‍ය තාන්ත්‍රිකයන් සමග අන්තර් ක්‍රියාකාරී සැසියක් මහ කොමසාරිස් පරිශ්‍රයේදී පැවැත්වීය.
මෙම සැසිවාරයට බෙලාරුස්, සයිප්‍රසය, ඉතියෝපියාව, ජෝර්දානය, කෙන්යාව, අයර්ලන්තය, ඊශ්‍රායලය, පේරු සහ තුර්කිය යන රටවල වාණිජ රාජ්‍ය තාන්ත්‍රිකයෝ සහභාගි වූහ. මෙම හමුවේදී මහ කොමසාරිස් මොරගොඩ, ජාත්‍යන්තර මූල්‍ය අරමුදලේ විස්තීරණ අරමුදල් පහසුකම් සැලසීම, ඉන්දීය රුපියල් වෙළෙඳාම සහ ඉන්දියාව සමග සැලසුම් සහගත ආර්ථික ඒකාබද්ධතාව පිළිබඳව සහභාගිවන්නන් යාවත්කාලීන කළේය. මෙම සාකච්ඡාව ශ්‍රී ලංකාවේ ආර්ථිකය ප්‍රකෘති කිරීම කෙරෙහි විශේෂ අවධානයක් යොමු කරමින් පුළුල් පරාසයක වෙළෙඳ සහ වාණිජ මාතෘකා සාකච්ඡා කරන ලදී.
