මරණ පරීක්ෂණයේදී හෙළිවෙයි
අනුරාධපුර කොට්ඨාස අපරාධ විමර්ශන අංශය මගින් අත්අඩංගුවට ගෙන සිදුකළ පහර දීමකින් ජීවිතක්ෂයට පත් වූ බවට ඥාතීන් සහ ගම්වාසීහු චෝදනා එල්ල කළ 22 හැවිරිදි තරුණයාගේ මරණය සම්බන්ධයෙන් සිදුකළ පරීක්ෂණ වාර්තාවලට අනුව ශරීරයේ අයිස් හා හෙරොයින් මත්ද්‍රව්‍ය තිබූ බවත් සිරුරේ අභ්‍යන්තර තුවාල කිසිවක් නොතිබූ බවත් වාර්තා වී තිබේ. එම මරණය සම්බන්ධයෙන් ඉකුත් 31 සහ පෙරේදා (01 දා) අනුරාධපුර ශික්ෂණ රෝහලේදී පශ්චාත් මරණ පරීක්ෂණය සිදුකර මරණයට හේතුව විමර්ශන යටතේ පවතින බව සටහන් කර තිබේ. මෙම පරීක්ෂණයේදී නිරීක්ෂණ වාර්තාවට අනුව මෘතශරීරයේ, උදරය තුළ කැඩීගිය ප්ලාස්ටික් පැකට්ටුවක් තිබූ බවත්, මරණකරුගේ මුත්‍රා සම්බන්ධව සිදුකළ පරීක්ෂණයේදී එම මුත්‍රාවල අයිස් හා හෙරොයින් මත්ද්‍රව්‍ය අඩංගුව තිබූ බවට හඳුනා ගෙන ඇති බවද සටහන් වේ. මරණයට හේතු විය හැකි හෝ ඊට දායක විය හැකි අභ්‍යන්තර තුවාල කිසිවක් නිරීක්ෂණය නොවන බවටද වාර්තා වේ. ඒ අනුව පශ්චාත් මරණ පරීක්ෂණයේ සාක්ෂි සඳහා මෙම නඩුව ලබන 13දා නැවත කැඳවන බව එම වාර්තාවේ වැඩිදුරටත් සඳහන් වේ. අනුරාධපුර දෙවැනි පියවරේ පදිංචි 22 හැවිරිදි සනුක ගිහාන් මාරඹගේ නමැති තරුණයා පොලිස් අත්අඩංගුවට ගෙන සිටියදී සිදුකළ පහරදීමකින් ජීවිතක්ෂයට පත් වූ බව පවසමින් ඥාතීන් හා ගම්වාසීහු පිරිසක් ඉකුත් 30 දා රාත්‍රී අනුරාධපුර පොලිසිය අසලදී සහ අනුරාධපුර ශික්ෂණ රෝහලේ දී මාධ්‍ය වෙත ප්‍රකාශ ලබා දුන්හ. පොලිසිය වැටලීම සිදු කරන අවස්ථාවේදී බියට පත් වූ මෙම තරුණයා අයිස් මත්ද්‍රව්‍ය අඩංගු පැකට්ටුවක් ගිල දමන්නට ඇති බවට සැක කරන බවත් මෙහිදී අදහස් දැක්වූ පොලිස් නිලධාරියෙකු පැවසීය.
මිහින්තලේ – රංග චතූ
