තමන් සමගි ජනබලවේගය පක්‍ෂයෙන් නෙරපා හැරීම අභියෝගයට ලක්කරමින් ඇමැති හරින් ප්‍රනාන්දු සහ ඇමැති මනුෂ නානායක්කාර යන මහත්වරුන් ගොනු කර ඇති පෙත්සම් සම්බන්ධයෙන් විමසීම ලබන ඔක්තෝබර් 10, 12 සහ 13 යන තෙදිනෙහි පැවැත්වීමට ශ්‍රේෂ්ඨාධිකරණය ඊයේ (15දා) දින නියම කළේය.
එම පෙත්සම් පී. පද්මන් සූරසේන, ජනක් ද සිල්වා සහ මහින්ද සමයවර්ධන යන විනිසුරු මඬුල්ල හමුවේදී කැඳවිණි. එම පෙත්සම් සම්බන්ධයෙන් විවාදය ලබන නොවැම්බර් 28 වැනිදා පැවැත්වීමට අධිකරණය විසින් දින නියම කර තිබූ නමුත් එවැනි කරුණක් සම්බන්ධයෙන් පෙත්සමක් ඉදිරිපත් වූ විට මාස දෙකක කාලයක් තුළදී විමසීම් සිදුකර අවසන් කළ යුතු බව කියමින් ජනාධිපති නීතිඥ ජයම්පති වික්‍රමරත්න මහතා ඉදිරිපත් කළ මූලික විරෝධතාවය කෙරෙහි අවධානය යොමු කළ විනිසුරු මඬුල්ල සතියක් ඇතුළත එකී විරෝධතාවය ලිඛිතව ඉදිරිපත් කරන ලෙසටත් ඊයේ (15දා) සිට දෙසතියක් ඇතුළත ප්‍රතිවිරෝධතා ගොනු කරන ලෙසටත් නියෝග කළේය. නීතිඥ දිනේෂ් විදානපතිරණ මහතා සමග ජනාධිපති නීතිඥ රෝලන්ඩ් පෙරේරා මහතා පෙත්සම්කාර අමාත්‍යවරුන් වෙනුවෙන් පෙනී සිටියේය.
ඒ. ජේ. ඒ. අබේනායක
