ආරක්‍ෂක අමාත්‍යාංශයේ ලේකම් විශ්‍රාමික ජෙනරාල් කමල් ගුණරත්න මහතා විසින් රචනා කරන “තාරාගේ ආගමනය” හා “කඩොල් ඇත්තු” (පරිවර්තන) නවකතා ද්විත්වය සහ “ඇහේ කඳුළැලි” ගීතය එළිදැක්වීමේ උත්සවය ජනාධිපති රනිල් වික්‍රමසිංහ මහතාගේ ප්‍රධානත්වයෙන් කොළඹ ආනන්ද විද්‍යාලයීය කුලරත්න ශාලාවේ දී පැවැත්විණි.
නවකතා ද්විත්වයෙහි පළමු පිටපත් විශ්‍රාමික ජෙනරාල් කමල් ගුණරත්න මහතා විසින් මෙහිදී ජනාධිපතිවරයා වෙත පිළිගන්වන ලදී.
අනතුරුව අග්‍රාමාත්‍ය දිනේෂ් ගුණවර්ධන, හිටපු කථානායක කරු ජයසූරිය සහ ජාතික ආරක්‍ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක යන මහත්වරුන් වෙත කෘති පිළිගැන්වීම සිදු විය.
ආරක්‍ෂක අමාත්‍යාංශයේ ලේකම් විශ්‍රාමික ජෙනරාල් කමල් ගුණරත්න මහතා විසින් රචිත “ඇහේ කඳුළැලි” ගීතය යසස් මැදගෙදර මහතා විසින් ගීතවත් කර ඇති අතර ගායිකා අභිෂේකා විමලවීර මහත්මිය විසින් එය ගායනා කරනු ලබයි.
මහාචාර්ය ප්‍රනීත් අබේසුන්දර මහතා උත්සවයේ ප්‍රධාන දේශනය සිදු කළේය.
ආනන්ද විද්‍යාලයේ පුස්තකාලය වෙත පිරිනැමුණු ග්‍රන්ථ කට්ටලය එම විද්‍යාලයේ විදුහල්පති ලාල් දිසානායක මහතා වෙත මෙහිදී භාර දෙනු ලැබීය.
මහා සංඝරත්නය ප්‍රමුඛ සෙසු ආගමික නායකයන් ද, අමාත්‍යවරුන් වන අලි සබි්‍ර, ටිරාන් අලස්, සුසිල් ප්‍රේම්ජයන්ත් යන මහත්වරුන් සහ රාජ්‍ය අමාත්‍යවරුන්, පාර්ලිමේන්තු මන්ත්‍රීවරුන්, තානාපතිවරුන්, විද්වතුන්, කලාකරුවන් ඇතුළු ආරාධිත පිරිසක් මෙම අවස්ථාවට එක්ව සිටියහ.
