පොලිස් පොඩ්ඩන්ට සාක්ෂිකරුවන්ට බලපෑම් කළාට
ගාල්ල උණවටුන ප්‍රදේශයේ සංචාරක හෝටලයක විදේශිකයන්ගේ මුදල් සොරකම් කිරීමේ සිද්ධියකදී පොලිස් නිලධාරීන්ට සහ සාක්ෂිකරුවන්ට අයුතු බලපෑම් කිරීමේ චෝදනාව සම්බන්ධයෙන් පොලිස්පතිවරයාට සහ විශේෂ විමර්ශන ඒකකයේ අධ්‍යක්ෂවරයාට එරෙහිව අධිචෝදනා ගොනු කළ හැකිද යන්න පිළිබඳව නීතිපතිවරයාගෙන් කරුණු විමසන ලෙස ගාල්ල ප්‍රධාන මහෙස්ත්‍රාත් ඉසුරු නෙත්තිකුමාර මහතා නියෝග කර ඇත.
රුසියානු සංචාරකයන් පිරිසකට අයත් රුපියල් ලක්ෂ 60කට අධික විදේශ මුදල් සොරකම් කිරීම සම්බන්ධයෙන් උණවටුනේ සංචාරක හෝටල් හිමිකරුවකු, ඔහුගේ පුත්‍රයා සහ තවත් පුද්ගලයකු ගාල්ල කොට්ඨාස අපරාධ විමර්ශන ඒකකය විසින් මේ වසර මුල අත්අඩංගුවට ගෙන තිබේ.
හෝටල් දෙකක නවාතැන් ගෙන සිටි රුසියානු සංචාරකයන් පිරිසකගෙන් ලද පැමිණිලි මත විමර්ශන සිදු කළ අපරාධ විමර්ශන ඒකකය සහ උණවටුන සංචාරක පොලිසිය මේ වසරේ ජනවාරි මාසයේ හෝටලයක හිමිකරු, ඔහුගේ පුතා සහ ගණකාධිකාරීවරයකු මෙසේ අත්අඩංගුවට ගෙන ඇත.
සැකකරුවන් විසින් රුපියල් 752,772 ක්, ඇමෙරිකානු ඩොලර් 61,000 ක්, රූබල් 195,000 ක් සහ යුරෝ 200 ක් සොරකම් කර ඇති බව පොලිසිය සඳහන් කර තිබේ. උණවටුන සංචාරක පොලිසියේ සහාය ඇතිව ගාල්ල කොට්ඨාස අපරාධ විමර්ශන ඒකකය සහ හබරාදූව පොලිසිය වැඩිදුර විමර්ශන සිදු කර ඇත.
කෙසේ වෙතත්, මෙම සොරකමට සම්බන්ධ ප්‍රධාන සැකකරු වන හෝටලයේ හිමිකරු අත්අඩංගුවට නොගන්නා ලෙසට පොලිස්පතිවරයා සහ විශේෂ විමර්ශන ඒකකයේ අධ්‍යක්ෂවරයා තමන්ට බලපෑම් කළ බව උණවටුන සංචාරක පොලිසියේ ස්ථානාධිපතිවරයා ගාල්ල ප්‍රධාන මහෙස්ත්‍රාත් අධිකරණය හමුවේ මේ වසරේ මාර්තු මාසයේදී නඩුවක් පවරා තිබේ.
ජ්‍යෙෂ්ඨ පොලිස් නිලධාරීන්ගේ අණ නොපිළිපැදීම සම්බන්ධයෙන් පොලිස් ස්ථානාධිපතිවරයාට සහ ඊට පටහැනිව කටයුතු කළ නිලධාරීන්ට එරෙහිව පොලිස් දෙපාර්තමේන්තුව අභ්‍යන්තර පරීක්ෂණයක් ආරම්භ කර ඇති බව වාර්තා වේ.
මෙම නඩුව ජූලි 19 වැනිදා ගාල්ල ප්‍රධාන මහෙස්ත්‍රාත්වරයා හමුවේ කැඳවූ අවස්ථාවේදී මහෙස්ත්‍රාත්වරයා නියෝග කර ඇත්තේ අදාළ චෝදනා සම්බන්ධයෙන් පොලිස්පතිවරයාට සහ අධ්‍යක්ෂවරයාට එරෙහිව අධිචෝදනා ගොනු කළ හැකිද යන්න පිළිබඳව නීතිපතිවරයාගෙන් කරුණු විමසන ලෙසයි.
එවැනි වරදක් සිදු වූ විට මහාධිකරණයක් හමුවේ අධිචෝදනා ඉදිරිපත් කිරීම නීතිපතිවරයාගේ වගකීමක් බව මහෙස්ත්‍රාත්වරයා මෙහිදී දැනුම් දී ඇත. කෙසේ වෙතත්, මේ වන විට අධිකරණයට ඉදිරිපත් කර ඇති කරුණු අනුව විමර්ශනයට යම් බලපෑමක් සිදුවී ඇති බව පැහැදිලි වන බව මහෙස්ත්‍රාත්වරයා අධිකරණයට දන්වා තිබේ.
උණවටුන සංචාරක පොලිසියේ ස්ථානාධිපතිවරයාට හෝ ඔහුගේ නියෝග යටතේ ක්‍රියා කරන නිලධාරීන්ට එරෙහිව පොලිස් දෙපාර්තමේන්තුව විසින් ආරම්භ කර ඇති අභ්‍යන්තර විමර්ශනය අත්හිටුවීමේ නියෝගය තවදුරටත් දීර්ඝ කිරීමට ද මහෙස්ත්‍රාත්වරයා නියෝග කර ඇත.
චමින්ද සිල්වා
