“අවුරුද 2500 කටත් වඩා පවත්වා ගෙන එන බුද්ධ චරිතය, සිද්ධාර්ථ චරිතය හා නිර්මල බුද්ධ ධර්මය අද සමහර භික්ෂූන් හා පුද්ගලයන් විසින් විකෘති කරමින් සිටිනවා, මේ සම්බන්ධව රජය මෙයට වඩා සැලකිලිමත්ව කටයූතූ කළ යුතු” යයි රාමඤ්ඤ මහා නිකායේ අතිපූජ්‍ය අග්ග මහා පණ්ඩිත මකුලාවේ සිරි විමල මහානායක හිමියෝ කෑගල්ලේ පැවති උත්සවයකදී පැවසූහ.
උන්වහන්සේ එසේ පැවසුයේ මිරිහැල්ල සිරි සම්බෝධි විහාරය සහ ජාත්‍යන්තර බෞද්ධ මධ්‍යස්ථානයේ අටවිසි බෞද්ධ මන්දිරය හා අවුරුදු 300 කටත් වඩා පැරණි බෝධිය වටා ඉදිකෙරුණු බෝධි ප්‍රාකාරය විවෘත කිරීමේ උත්සවයේදී පැමිණ සිටි පිරිස අමතමිනි.
“අප බුදුරජාණන් වහන්සේ සාරාසංඛ්‍ය කල්ප ලක්ෂයක් පෙරුම් පුරා ලබා ගත් බෞද්ධ දර්ශනය අද ලෝකයාම පිළිගන්නවා. අද මේ රටේ මිථ්‍යා දෘෂ්ටික පුද්ගලයන් හා භික්ෂුන් මේවා වරදවා දේශනා කරනවා. බුදුරජාණන් වහන්සේ ඉපදුණේ ලංකාවේලු. බුදු වුණේ ලංකාවේලු. පිරිනිවන් පෑවේත් මේ රටේදීලු. මෙවැනි මිථ්‍යා මත පළ කරමින් තමා රහත් වුණු පඬිවරයෙක් බවට අඟවමින් බෞද්ධ ජනතාව මුළා කරමින් යනවා. මේ කටයුතු සොයා බලන්න කියා මහානායක ස්වාමීන් වහන්සේලා රජය දැනුවත් කර තිබෙනවා.
අද පන්සල්වල තරුණ භික්ෂූන් වහන්සේලා අඩුයි. සමහර පන්සල්වල ඇත්තේම නැහැ. මෙම ස්ථානයේ තරුණ භික්ෂූන් සිටීම සතුටට කරුණක්. අපේ දායකයන් අද ජීවත් වන්නේ ඉතාමත් අමාරුවෙන්. ඒත් කොහොම හරි පන්සලට දානේ ටික ගෙනවිත් දෙනවා. දානය දීමෙන් විශාල වශයෙන් පින් සිදුවෙනවා. සිල් රැකීමත් භාවනාවත් කළ යුතුයි. ඉන් විශාල වශයෙන් පින් රැස්වෙනවා මෙන්ම හොඳ ආත්මයක් ලබන්නත් හේතු වෙනවා” යයිද රාමඤ්ඤ මහ නාහිමියෝ පැවසූහ.
රාමඤ්ඤ නිකායේ අනුනායක දීවෙල මහින්ද හිමියන්ද අනුශාසනාවක් සිදු කළ අතර මෙයට දෙවසරකට පෙර අපවත් වී වදාළ දීවෙල ධම්මානන්ද හිමියන්ට පින් පිණිස ගුණානුස්මරණ පින්කමක් ද පැවැත්විණි. විහාරවාසී සුනන්ද හිමියන් විසින් මෙම උත්සවය සංවිධානය කරන ලදි.
කෑගල්ල – එම්. බී. පහළවත්ත
