එන්නත්කරණ සැලසුම වෙනස් කළේ කවුරුන් ද, විදේශීය සංචාරකයන් ගෙන ඒමේ තීන්දුව ගනු ලැබුවේ කවුරුන්ද ඇතුළු ප්රමුඛ ප‍්‍රශ්න දහයක් සඳහා පිළිතුරු අපේක්ෂාවෙන් ජනතා විමුක්ති පෙරමුණ ඊයේ (02 වැනිදා* රජයට ප‍්‍රශ්නාවලියක් ඉදිරිපත් කර ඇත.
එය මෙසේය.
සෞඛ්‍ය අමාත්‍යාංශය විසින් 2021 ජනවාරි 18 දින ඉදිරිපත් කරන ලද ජාතික එන්නත්කරණ සැලැස්ම හදිසියේ වෙනස් කර අවුරුදු 60ට වැඩි අයට එන්නත් ප‍්‍රමුඛතාව නොදීමට තීන්දු කළේ කවුද?, සයිනොෆාම් එන්නත සති 05ක් ප‍්‍රමාද කිරීම ගැන ජනාධිපතිවරයා ඇතුළු ආණ්ඩුව ඖෂධ නියාමන අධිකාරියේ නිලධාරීන්ට චෝදනා කරයි. එසේ ප‍්‍රමාද කිරීමට කටයුතු කළ ඖෂධ නියාමන අධිකාරියේ සහ විශේෂඥ කමිටුවේ නිලධාරීන් කවුද? ඔවුන් සම්බන්ධයෙන් මෙතෙක් අනුගමනය කරන ලද ක‍්‍රියාමාර්ග කවරේද, එන්නත් ආනයනය ප‍්‍රමාද කර, ඒ පිළිබඳ විශ්වාසය වෙනතක යවා ‘කෑගල්ලේ ධම්මික පැණිය’ වැනි දෑ ප‍්‍රවර්ධනය කරන්නට සෞඛ්‍ය අමාත්‍යංශයේ රෝහල් භාවිත කරනු ලැබීය. එයට ආයුර්වේද දෙපාර්තමේන්තුව ඇතුළු රාජ්‍ය ආයතනවල ලියාපදිංචිය ලබා දීමට බලපෑම් සිදුවිය.
එවැනි ආකාරයේ ප‍්‍රචාරණයකට හවුල් වූ රාජ්‍ය නිලධාරීන්, රාජ්‍ය අමාත්‍යවරුන්, මන්ත‍්‍රීවරුන්, පාර්ලිමේන්තුවේ ප‍්‍රධානීන් සහ ඇතැම් මාධ්‍ය ප‍්‍රධානීන් මේ පැණි කෝලමේ වගකීම භාර ගන්නේද?, සෞඛ්‍ය අමාත්‍යාංශය මැදිහත් වී සෞඛ්‍ය වෛද්‍ය නිලධාරි ප‍්‍රදේශ මගින් එන්නත්කරණය සිදු කරමින් පවතී. එවැනි තැන්වලට නියමිත ප‍්‍රමාණයට වඩා එන්නත් අඩුවෙන් ලබා දී හිතාමතා එම ප‍්‍රදේශවල තදබදයක් ඇති කරමින් තිබේ.
සෞඛ්‍ය අංශ සම්බන්ධව ජනතාව තුළ දෝෂදර්ශනයක් ඇති කිරීමට සැලසුම් සහගතව ක‍්‍රියාත්මක වන බව පෙනේ. මේ එන්නත් හිඟය සම්බන්ධ ගැටුම් ඇති කිරීමට අදාළ තීන්දුව පැමිණෙන්නේ කොතැනකින්ද? එසේම ඇතැම් එන්නත් සෞඛ්‍ය අමාත්‍යාංශයට ලබා නොදීමටත් ඇතැම් එන්නත් සමහර ප‍්‍රදේශවලට ලබා නොදීමටත් අදාළ තීන්දු ගනිමින් සිටින්නේ කවුරුන්ද?, කොවිඞ් ආසාදිතයින් හා මරණ සම්බන්ධයෙන් දත්ත පිළිබඳව ගැටලූකාරී තත්ත්වයක් පවතී. මෙම දත්ත වෙනස් කිරීම සම්බන්ධ චෝදනා එල්ල වී ඇත. ඉහළ හමුදා නිලධාරියකු සහ විශේෂඥ වෛද්‍යවරුන් දෙදෙනකු සම්බන්ධ බවට ආණ්ඩු පක්ෂයේ මන්ත‍්‍රීවරයකු චෝදනා කර තිබුණි. මෙසේ චෝදනා එල්ල කරන ලද අයගෙන් සහ එල්ල වූ අයගෙන් අවම වශයෙන් ප‍්‍රකාශ ලබා ගෙන රටට නිවැරදි තොරතුරු ලබාදීමට ආණ්ඩුව කටයුතු කරන්නේද?, ඖෂධ නියාමන අධිකාරියේ දත්ත ගබඩාව හදිසියේ මැකී යෑම සම්බන්ධයෙන් ගැටලූවක් සාකච්ඡා වෙමින් ඇත. එහි දත්ත ගොනු ලක්ෂ 11ක් අතුරුදන් වී තිබේ.
මෙය හුදු සෞඛ්‍ය පිළිබඳව පමණක් නොව රාජ්‍ය ආරක්ෂාව පිළිබඳවත් ගැටලූවකි. මේ සම්බන්ධයෙන් වගකීම භාර ගනු ලබන්නේ කවුද? ඔවුන් පිළිබඳව ගනු ලැබූ ක‍්‍රියාමාර්ග කවරේද? දත්ත හානිය නිසා ඖෂධ හා සෞඛ්‍ය මෙවලම් ලියාපදිංචිය ප‍්‍රමාද වී තිබේද? එය කොවිඞ් මර්දනයට බලපා ඇත්තේ කවරාකාරයෙන්ද?, පීසීආර් හා රැපිඞ් ඇන්ටිජන් පරීක්ෂණවල මිල සම්බන්ධයෙන් ආන්දෝලනයක් ඇතිව තිබේ. ජනතාව ඒ වෙනුවෙන් විශාල මුදලක් වියදම් කරමින් සිටිති. මේවායේ මිල ගණන් සම්බන්ධයෙන් නැගෙන චෝදනා පිළිබඳව ලබා දෙන පිළිතුර කුමක්ද?, මේ වන විට පීසීආර් හා රැුපිඞ් ඇන්ටිජන් පරීක්ෂණ දෛනිකව ලක්ෂයක පමණ ප‍්‍රමාණයක් සිදු කළ යුතුව තිබේ. නමුත් ඒවා සිදු කෙරෙන්නේ දෛනිකව 20,000ට ආසන්න ප‍්‍රමාණයකි.
මෙම ප‍්‍රමාණය වැඩි නොකිරීමට හේතු කවරේද?, කොවිඞ් රැලි අනුව ඒ සම්බන්ධයෙන් වගකීම් දැරූ නිලධාරීන් මාරු වී ඇත. කොවිඞ් මර්දනයේදී ප‍්‍රමුඛතම කාර්යභාරයක් ඉටු කළ හා අත්දැකීම් ලැබූ සෞඛ්‍ය අමාත්‍යාංශ නිලධාරීන් ඉවත් කිරීමට තීන්දු ගනු ලැබුවේ කවුද? සහ මේ වන විට දකුණු අප‍්‍රිකානු ප‍්‍රභේදය පිළිබඳව අනතුරු හඟවනු ලැබ තිබේ. එසේ තිබියෙදී ඉන්දියානු සංචාරකයන් ඇතුළු විදෙස් සංචාරකයන් ගෙන්වීමට අදූරදර්ශී තීන්දුවක් ගනු ලැබුවේ කවුරුන් විසින්ද? යන්න එකී ප්රමුඛ ප‍්‍රශ්න වේ.
ජනාධිපතිවරයා සහ ජනාධිපති කාර්ය සාධක බලකාය මෙම ප‍්‍රශ්න 10 සඳහා රටේ ජනතාවට පිළිතුරු දිය යුතු බව එම පක්ෂයේ මධ්‍යම කාරක සභික නලින්ද ජයතිස්ස මහතා පැවසීය.
සිරිමන්ත රත්නසේකර
