ශ්‍රී ලංකා ක්‍රිකට් ආයතනය විසින් පවත්වනු ලබන ලංකා ප්‍රිමියර් ලීග් ක්‍රිකට් තරගාවලියේ සිව්වැනි අදියර සඳහා වන ‘විදේශීය ක්‍රීඩකයින් ලියාපදිංචි කිරීම’ ආරම්භ කිරීමට පියවර ගෙන තිබේ.
තරගාවලිය නියෝජනය කිරීමට කැමැති විදේශීය ක්‍රීඩකයින් https://srilankacricket.lk/lpl-playerregistration-portal/යන වෙබ් පිවිසුම හරහා කාණ්ඩ දෙකක් යටතේ ලියාපදිංචි විය හැක. මෙහි එක් කාණ්ඩයක් ජාත්‍යන්තර තරග නියෝජනය කළ ක්‍රීඩකයින් වෙනුවෙන්ද (Capped) අනෙක් කාණ්ඩය දේශීය තරගවලට පමණක් ක්‍රීඩා කරන ලද ක්‍රීඩකයින්ට (Uncapped) ද ලියාපදිංචි විය හැක.
Capped ක්‍රීඩකයින්
මෙම කාණ්ඩය යටතේ අවම වශයෙන් තම රට වෙනුවෙන් ටෙස්ට්, එක්දින හෝ විස්සයි-20 යන ආකෘති තුනෙන් එක් අංශයක් එක් වරක් හෝ නියෝජනය කර ඇත්නම් ඔහු “Capped” ක්‍රීඩකයකු ලෙසින් සලකනු ලැබේ.
Uncapped ක්‍රීඩකයින්
මෙම කාණ්ඩය යටතේ තම රට නියෝජනය කර නොමැති නමුත් එරට පළමු පෙළ ක්‍රිකට් තරගාවලි ක්‍රීඩා කර ඇති හෝ ජාත්‍යන්තර ක්‍රිකට් කවුන්සිලයේ (ICC) පූර්ණ හෝ ඒ ආශ්‍රිත සාමාජිකයකු විසින් අනුමත කරන ලද ෆ්‍රැන්චයිස් විස්සයි-20 ක්‍රිකට් ලීගයක් නියෝජනය කර ඇති ක්‍රීඩකයින්ට “Uncapped” ක්‍රීඩකයින් යටතේ ලියාපදිංචි විය හැක.
හිටපු ශ්‍රී ලංකා ක්‍රීඩකයින්
ශ්‍රී ලංකාව වෙනුවෙන් ක්‍රීඩා කර ක්‍රිකට්වලින් සමුගෙන සිටින එහෙත් තවමත් ජාත්‍යන්තර ක්‍රිකට් කවුන්සිලයේ පූර්ණ හෝ ආශ්‍රිත සාමාජිකයින් විසින් පවත්වනු ලබන තරගකාරී ෆ්‍රැන්චයිස් ක්‍රිකට් ක්‍රීඩාවේ නියුතුව සිටින ක්‍රීඩකයින්ටද https://srilankacricket.lk/lpl-player-registration-portal/ යන වෙබ් පිවිසුම හරහා ලියාපදිංචි විය හැක.
තරගාවලිය නියෝජනය කිරීමට බලාපොරොත්තු වන සියලුම ක්‍රීඩකයින් 2023 මැයි මස 25 වැනිදා ප.ව. මධ්‍යහ්න 12 ට පෙර සිය ලියාපදිංචි කිරීම් අවසන් කර යුතුය. මීට අමතරව අදාළ කණ්ඩායම් හි අයිතිකරුවන් විසින් ඔවුන් කැමති ක්‍රීඩකයන් සමග මේ වන විටත් ගිවිසුම් ගත වී ඇත.
සිව්වැනි වතාවටත් පවත්වනු ලබන ලංකා ප්‍රිමියර් ලීග් තරගාවලිය ලබන ජූලි මස 30 වැනිදා සිට අගෝස්තු 20 වැනිදා දක්වා පැවැත්වේ.
