ජන ජීවිත බිල්ලට දෙන, සෞඛ්‍ය පද්ධතිය විනාශ කරන ආණ්ඩුවට එරෙහිව පෙළ ගැසෙමු ! යනුවෙන් (07 දා) දින පස්වරුවේ අයිතීන් උදෙසා කාන්තාවෝ සංවිධානය කොළඹ රෝහල් චතුරශ්‍රය අසළදී විරෝධතාවක් පවත්වනු ලැබීය.
එහිදී මාධ්‍ය වෙත අදහස් දැක්වූ අයිතීන් උදෙසා කාන්තාවෝ සංවිධානයේ සභාපති සරෝජා පෝල්රාජ් මහත්මිය අවධාරණය කර සිටියේ විශේෂයෙන්ම මේ වනවිට රෝහල් තුළ අත්‍යවශ්‍ය බෙහෙත් නොමැති බවත් ප්‍රධාන රෝහල් තුළ පවතින සීටී ස්කෑන් යන්ත්‍ර, එම්.ආර්.අයි යන්ත්‍ර විශාල ප්‍රමාණයක් අක්‍රීය වී ඇති බවත්ය. එසේම දැඩිසත්කාර ඒකකවල ප්‍රතිකාර කිරීමට අවශ්‍ය සෞඛ්‍ය උපකරණවල දැඩි හිඟයක් පවතින අතර සෞඛ්‍ය ඇමතිවරයා ප්‍රමුඛ බලධාරීන්ගේ නොසැලකිලිමත් භාවය හේතුවෙන් මේ වනවිට රෝගීන් විශාල ප්‍රමාණයකගේ ජීවිත අවධානමකට ලක්ව ඇති බවත් ඇය වැඩිදුරටත් පැවසුවාය.
මේ වනවිට පාර්ලිමේන්තුව හමුවේ සෞඛ්‍ය ඇමතිවරයාට එරෙහිව විශ්වාසභංග යෝජනාවක් ඉදිරිපත් වී ඇති නමුත් සෞඛ්‍ය ඇමතිවරයා පමණක් නොව ජන ජීවත බිල්ලට දෙමින් කටයුතු කරන ජනාධිපතිවරයා, කැබිනට් මණ්ඩලය ප්‍රමුඛ ආණ්ඩුවට එරෙහිවම විශ්වාසභංග යෝජනාවක් ඉදිරිපත් කර එළවා දැමිය යුතු බව මෙහිදී අදහස් දැක්වූ අයිතීන් උදෙසා කාන්තාවෝ සංවිධානයේ ලේකම් සමන්මලී ගුණසිංහ මහත්මිය පැවසුවාය.
