සිද්ධිය දුටු වැඩිහිටියාට පපුවේ අමාරුව හැදිලා
යකඩ බටයක ආධාරයෙන් ප්‍රධාන මාර්ගය අසල අඹ ගසක අඹ කැඩීමට ගිය 16 හැවිරිදි පාසල් දරුවකු එම යකඩ බටය අසල තිබූ අධිබල විදුලි රැහැනක ගැටී විදුලි සර වැදීම නිසා හලාවත මහ රෝහලට ඇතුළත් කිරීමෙන් අනතුරුව මියගොස් ඇත.
පෙරේදා (16 වැනිදා) සවස 5ට පමණ බිංගිරිය රෝහල ආසන්නයේ සිදුවූ මෙම අවාසනාවන්ත සිදුවීමෙන් මියගොස් ඇත්තේ බිංගිරිය ශ්‍රී සරණංකර ජාතික පාසලේ සිසුවකු වන චතුර සේමික නමැති 16 හැවිරිදි පාසල් සිසුවෙකි.
ඔහු සමග අඹ කැඩීම සඳහා පැමිණි වැඩිහිටි පුද්ගලයකු දරුවා විදුලි සර වැදී ගසෙන් බිම වැටෙනු දැක කම්පනය නිසා ඇතිවූ ක්ෂණික හෘදයාබාධයකින් බිංගිරිය රෝහලටත් එතැනින් හලාවත රෝහලටත් මාරුකර යවා ඇත.
සිද්ධිය පිළිබඳව බිංගිරිය පොලිසිය වැඩිදුර පරීක්‍ෂණ පවත්වයි.
බිංගිරිය – සෝමසිරි ඒකනායක
