නව වසරේ රාජකාරි ආරම්භ කරමින් ජනාධිපති රනිල් වික්‍රමසිංහ කියයි
රට තුළ සාමාන්‍ය තත්ත්වයක් ඇති කරන්න අපි පසුගිය මාස පහ හමාර තුළදී පියවර රැසක් ගත් බවත් රට ණය බරින් නිදහස් කර ගනිමින් ණය ප්‍රතිව්‍යුහගතකරණ වැඩසටහන ක්‍රියාත්මක කර අප ඉදිරියට යා යුතු බවත් ජනාධිපති රනිල් වික්‍රමසිංහ මහතා පැවසීය.
මෙරට ආර්ථිකයේ තීරණාත්මක වසරක් වූ 2023 වසරේ රට වෙනුවෙන් වූ වගකීම් කිසිවෙකුට පැහැර හැරිය නොහැකි බව පැවසූ ජනාධිපති රනිල් වික්‍රමසිංහ මහතා සමෘද්ධිමත් ශ්‍රී ලංකාවක් වෙනුවෙන් නව වසරේ එක්ව කැපවෙමු යැයි සමස්ත රාජ්‍ය සේවකයින්ට ආරාධනා කළේය.
ජනාධිපතිවරයා මේ බව සඳහන් කළේ 2023 නව වසරේ ජනාධිපති කාර්යාලයේ කාර්ය මණ්ඩලය රාජකාරි ආරම්භ කිරීමේ අවස්ථාවට ඊයේ (02) පෙරවරුවේ එක් වෙමිනි. නව වසරේ රාජකාරි ආරම්භ කිරීම සනිටුහන් කරමින් ජනාධිපති රනිල් වික්‍රමසිංහ මහතා විසින් ජාතික ධජය එසවීමෙන් පසු සියලු කාර්ය මණ්ඩලය එක්ව රාජ්‍ය සේවා ප්‍රතිඥාව ලබා දුන්හ. නව වසර වෙනුවෙන් සිය කාර්ය මණ්ඩලයට සුබ පැතූ ජනාධිපතිවරයා ඔවුන් සමඟ තේ පැන් සංග්‍රහයකටද එක් විය.
එහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මහතා
සියලුදෙනාටම සුබ නව වසරක් වේවා ! කියා මම ප්‍රාර්ථනා කරනවා. මාස පහ හමාරකට පෙර මේ කාර්යාලයේ සිට අපි ඓතිහාසික වැඩ කොටසක් භාරගත්තා. ආණ්ඩු පාලනය කඩා වැටුණු අවස්ථාවකදී, ආර්ථිකය කඩා වැටුණු අවස්ථාවකදී රට තුළ සාමාන්‍ය තත්ත්වයක් ඇති කරන්න අපි ඒමාස පහ හමාර තුළදී පියවර ගත්තා. අපේ ආර්ථික ප්‍රශ්න සියල්ලම විසඳී නැහැ. නමුත් අද ඉන්ධන, ගෑස්, ආහාර ද්‍රව්‍ය, පොහොර අවශ්‍ය පරිදි ලබාදීමට අපට හැකියාව ලැබී තිබෙනවා. එම කටයුතු සඳහා මේ මාස පහ හමාර තුළ ඔබ සියලුදෙනා ලබා දුන් සහායට පළමුව මම මගේ ස්තුතිය පළ කරනවා. අපේ මෙම වැඩසටහන මෙතනින් අවසන් වී නැහැ. එහි වැදගත්ම වසර වන්නේ මෙම 2023 වසරයි. අපේ රට ණය බරින් නිදහස් කර ගනිමින් ණය ප්‍රතිව්‍යුහගතකරණ වැඩසටහන ක්‍රියාත්මක කර අප ඉදිරියට යා යුතු වෙනවා.
ඒ වගේම අපි නව ලෝකය සමග තරඟ කළ හැකි ආර්ථිකයක් ගොඩනැඟිය යුතුව තිබෙනවා. මේ රටේ දේශපාලන ක්‍රමවේදයේ වෙනසක් අවශ්‍යයි යන්න බහුතරයගේ මතයයි. මේ කරුණු දෙකම අප විසින් ඉටුකළ යුතුව තිබෙනවා. ඒ වගේම අද තිබෙන දේශපාලන ක්‍රමයේ ගැටලු විසඳිය හැකි නව ක්‍රමවේදයක් අප ඉදිරිපත් කළ යුතුව තිබෙනවා. මෙහිදී පසුගිය වසරට වඩා අප සියලුදෙනා සාමුහිකව එක්විය යුතුයි. අපි මේ ආණ්ඩුව දෙස බලන්නේ එක් යාන්ත්‍රණයක් ලෙස. මෙය අමාත්‍යාංශ අනුව වැඩසටහන් ගනණාවකට බෙදී නැහැ. එක් යාන්ත්‍රණයක අනු කොටස් ලෙසයි සියල්ල ක්‍රියාත්මක වන්නේ. ඒ නිසා කිසිවෙක් අතර තරඟකාරිත්වයක්, කඹ ඇදිල්ලක් සිදුවිය නොහැකි වගේම තමන්ගේ වගකිම් සීමා කළ නොහැකියි. ඔබ සියලු දෙනා රටේ මූලික ප්‍රතිපත්ති මාලාව ක්‍රියාත්මක කිරීමට බැඳී සිටිය යුතුයි. එම වැඩපිළිවෙළේදී කේන්ද්‍රස්ථානය වන්නේ මෙම ජනාධිපති කාර්යාලය, ඒ වගේම කැබිනට් කාර්යාලය සහ අග්‍රාමාත්‍ය කාර්යාලය. මෙම ආයතනවලින් තමයි මේ කටයුතු ඉදිරියට ක්‍රියාත්මක කෙරෙන්නේ.
ජනාධිපති ලේකම් සමන් ඒකනායක, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සහ ජනාධිපති කාර්ය මණ්ඩල ප්‍රධානී සාගල රත්නායක යන මහත්වරු සහ ජනාධිපති කාර්යාලයේ නිලධාරීහු ඇතුළු සියලු කාර්ය මණ්ඩල සාමාජික සාමාජිකාවන් මෙම අවස්ථාවට එක්ව සිටියහ.
ශ්‍යාම් නුවන් ගනේවත්ත
