බස් රථයක් හෝ දුම්රියක් මගහැරිය හැකි නමුත් ඉතා කලාතුරකින් හෝ ඔබට ගුවන් ගමනක් මග හැරේද? යමෙක් විදේශ සංචාරයක් සඳහා සතියකට හෝ දින ගණනකට පෙර සූදානම් වේ. ජාතික පැසිපන්දු කණ්ඩායම පසුගිය සතියේ ආසියානු කුසලානයට සහභාගිවීමට තායිලන්තයට පියාසර කිරීමට නියමිතව සිටි ගුවන් යානය මගහැරීමෙන් වාර්තා පොත්වලට ඇතුළත් විය.
පුද්ගලයන් 17 දෙනෙකුගෙන් සමන්විත ක්‍රීඩකයන් සහ සහායක කාර්ය මණ්ඩලයට ගුවන් ගමන මගහැරීමත් සමග ශ්‍රී ලංකා පැසිපන්දු සම්මේලනයට වෙනත් ගුවන් සමාගමකින් නව ප්‍රවේශපත්‍ර මිලදී ගැනීමට සිදු විය.
කෙසේ වෙතත් කණ්ඩායමට පළමු තරගයට සහභාගිවීමට සුළු කාලයක් තිබූ අතර නොයෙක් ප්‍රමාදයන් මධ්‍යයේ ශ්‍රී ලංකාවට ඔවුන්ගේ පළමු තරගය ක්‍රීඩා කිරීමට සිදුවීමෙන් තත්ත්වය වඩාත් නරක අතට හැරුණි. ඔවුන් ආරම්භක තරගයේ කසකස්තානය හමුවේ ලකුණු 66-34ක් ලෙස පරාජයට පත්වූ අතර ජෝර්දානය ද ශ්‍රී ලංකාව 82-41ක් ලෙස පරාජය කළේය. සත්කාරක තායිලන්තය සමග කණ්ඩායමේ අවසන් තරගය අද පැවැත්වීමට නියමිතය.
