ආණ්ඩුක්‍රම ව්‍යවස්ථාවේ 20 වැනි සංශෝධනය සම්මත කළ දිනයේ තමා ඊට ඡන්දය නොදී පාර්ලිමේන්තු පුස්තකාලයේ හැංගිලා සිටියා යැයි රාජ්‍ය ඇමැතිනී ගීතා කුමාරසිංහ මහත්මිය පාර්ලිමේන්තුවේ දී ඊයේ (21දා) කීවාය.
තමන් එදින පාර්ලිමේන්තු පැමිණිය ද ඊට පක්ෂව අත එසවීමට ක්‍රියා නොකළ බවද කී ඇය එහෙත් එදින තමන් කොහේ දැයි කියා මහින්දානන්ද ඇතුළු පිරිසක් සොයා බලා තිබූ බව ද කී කුමාරසිංහ මහත්මිය එහෙත් ඊට පසුව 20 වැනි සංශෝධනයට ඡන්දය නොදීමේ ‘රිටන් එක’ පසුව තමාට ලැබුණු බව ද කියා සිටියාය.
ඒ අනුව එදා පනස් දෙදෙනකුට නියෝජ්‍ය, රාජ්‍ය ඇමැතිකම් ලැබෙද්දී 53 වැනියා වූ තමාට කිසිදු ඇමැති ධුරයක් නොලැබුණු බවත් ඇය සඳහන් කළාය.
ද්විත්ව පුරවැසි භාවය සහිත අයකුට පාර්ලිමේන්තුවට පැමිණීමට නොහැකි ලෙස ගෙන එන විසිදෙවැනි ආණ්ඩුක්‍රම ව්‍යවස්ථා සංශෝධනයට නොබියව අත ඔසවා එය සම්මත කිරීමට සිය ඡන්දය ප්‍රකාශ කරන බව ද එම මහත්මිය කීවාය.
තමන් පාර්ලිමේන්තු පැමිණීම සඳහා ද්විත්ව පුරවැසිභාවය ඉවත් කර ගනිමින් පැමිණි ආකාරයටම ද්විත්ව පුරවැසි භාවය සහිත අයකුට එය ඉවත් කරගෙන පාර්ලිමේන්තු පැමිණිය හැකි බව ද ඇය වැඩිදුරටත් පැවසුවාය.
අකිත පෙරේරා, රනිල් ධර්මසේන
