මැදවච්චිය මහදිවුල්වැව වෙල් යායේදී වන අලියකු අනවසර විදුලි රැහැනක ගැටී 27 දා මියගොස් තිබේ.
වයස අවුරුදු 8 ක් පමණ වන මෙම වන අලියා කුඹුර මැදින් ගමන් කරමින් සිටියදී ගොවියකු විසින් ඇද තිබූ අනවසර විදුලි රැහැනක පැටලීමෙන් එම ස්ථානයේම මියගොස් ඇති බව අනුරාධපුර වනජීවී නිලධාරීන් සඳහන් කරයි.
සිද්ධිය සැලවූ වහාම වනජීවී නිලධාරීන් පැමිණ පරීක්ෂණ ආරම්භ කොට තිබේ.
වනජීවී නිලධාරීන් හා මැදවච්චිය පොලිසිය කුඹුරට අනවසරයෙන් විදුලිය ලබාගෙන වන අලියකු මියයෑමට සැලැස්වූ පුද්ගලයා සොයා පරීක්ෂණ ආරම්භ කොට තිබේ.
රජරට පාරිසරික සංවිධාන පෙන්වා දෙන්නේ 2024 ගත වූ දින කීපය ඇතුළත හදිසි අනතුරු හා මෙවැනි විදුලි රැහැන්වල පැටලීම නිසා මියගිය 20 වෙනි වන අලියා මෙම වන අලියා බවයි.
දිනසේන රතුගමගේ
