අපේක්ෂාවේ වේදිකා මංගල්‍යය 09 වැනිදා සිට ඇරැඹේ
ටවර්හෝල් රඟහල පදනම අධ්‍යක්‍ෂ ජනරාල්
ආචාර්ය ඩී. එම්. එස්. දිසානායක
නාට්‍යකරුවන්ට සහ නාට්‍ය ප්‍රේක්‍ෂකයන්ට තවත් අලුත් අත්දැකීමක් එකතුකරමින් ටවර් හෝල් රඟහල පදනම ඉදිරිපත් කරන ‘අපේක්ෂාවේ වේදිකා මංගල්‍යය’ ටවර් නාට්‍ය උළෙල 2023 මෙම මස 09 වැනිදා සිට 24 වැනිදා දක්වා පැවැත්වීමට සියලු කටයුතු සූදානම්. මේ සඳහා මුද්‍රිත අනුග්‍රහය ‘දිවයින සහ දි අයිලන්ඩ්’ පුවත්පත් මගින් ලබාදෙනව. උළෙලේ කටයුතු සිදුවෙන්නෙ මොන විදිහටද කියල දැන ගන්න අපි ටවර් හෝල් රඟහල පදනම අධ්‍යක්‍ෂ ජනරාල් ආචාර්ය ඩී. එම්. එස්. දිසානායකට කතා කළා.
● ‘අපේක්ෂාවේ වේදිකා මංගල්‍යය’ සංවිධානය වෙන්නෙ කොහොමද?
ටවර් හෝල් රඟහල පදනම අගමැතිවරයාගේ සභාපතිත්වයෙන් යුතුව භාරකාර මණ්ඩලයක් විසින් පාලනය කරනු ලබන ආයතනයක්. ඒ වගේම බුද්ධශාසන ආගමික හා සංස්කෘතික කටයුතු අමාත්‍යංශයේ විෂයපථයට අයත්වන ආයතනයක්. මේ ආයතනයේ ප්‍රධාන පරමාර්ථ අතර ශ්‍රී ලංකාවේ නෘත්‍ය, නාට්‍ය, ප්‍රාසාංගික කලාව ප්‍රවර්ධනය කිරීම, පෝෂණය කිරීම ඉදිරියෙන්ම තියෙනව. මේ වෙනුවෙන් වාර්ෂිකව නාට්‍ය උළෙලක් සංවිධානය කරනව. මෙවර සංවිධානය වෙන්නෙ ‘අපේක්ෂාවේ වේදිකා මංගල්‍යය’ ටවර් නාට්‍ය උළෙල 2023 නමින්. මේ මාසයේ 09 වැනිදා ආරම්භ වන නාට්‍ය උළෙල 24 වැනිදා දක්වා ටවර් හෝල් රඟහලේදී සහ එල්ෆින්ස්ටන් රඟහලේදී පැවැත්වෙනව. ඒ අනුව දිගු නාට්‍ය 25ක්, කෙටි නාට්‍ය 12ක් සහ ළමා නාට්‍ය 02ක් ඇතුළුව නාට්‍ය හතළිහකට ආසන්න ප්‍රමාණයක් මෙවර නාට්‍ය උළලේදී රඟදැක්වීමට කටයුතු සූදානම් කරල තියෙනව.
● මෙවර තේමාවට පසුබිම සැකසෙන්නෙ කොහොමද?
අපේ රටේ පසුගිය වසර පුරාවටම දේශපාලන, ආර්ථික වශයෙන් විශාල ප්‍රශ්න රැසක් මතු වුණා. මේ වියවුල් සහගත තත්ත්වයන්ගෙන් මිදිල රට ස්ථාවරභාවයට පත්වන සහ නිර්මාණකරුවන්, කලාකරුවන්, රාජ්‍ය ආයතන, නිලධාරීන් ජනතාව සමග එකතුවෙලා රට ගොඩනගන දිශානතියකට යොමු වෙන වසරක් ලෙස 2023 ගැන අපිට අපේක්‍ෂාවක් තියෙනව. මේ අපේක්‍ෂාව අරමුණු කරගෙන ටවර්හෝල් රඟහල පදනම විසින් සංවිධානය කරන නාට්‍ය උළෙල අපේක්ෂාවේ නාට්‍ය උළෙල යනුවෙන් නම් කළා.
● මෙවර නාට්‍ය උළෙළේ විශේෂත්වයක් තියෙනව?
ඔව්, මෙවර නාට්‍ය උළෙලටත් සුපුරුදු පරිදි සාම්ප්‍රදායික නාට්‍ය රැසක් ඇතුළත් කරල තියෙනව. ඒ වගේම මෙවර අපි වැඩිපුරම අවධානය යොමු කළේ සමාජය විසින් ඉල්ලා සිටින තරුණ නිර්මාණකරුවන්ගේ නාට්‍යවලට වැඩි ඉඩකඩක් ලබාදෙන්න.
● නාට්‍යකරුවන්ට රඟහල පමණක් ලබාදීම ප්‍රමාණවත්ද?
මේ අවස්ථාව වන විට රාජ්‍ය ආදායම පිළිබඳ ප්‍රශ්න තියෙනව. ඒ වගේම ටවර්හෝල් පදනම ඇතුළු රජයේ ආයතනවල ආදායම් පිළිබඳව ප්‍රශ්න මතුවෙලා තියෙනව. මේ තත්ත්වය යටතේ වුවත් ටවර් හෝල් සහ එල්ෆින්ස්ටන් රංග ශාලා මුදල් අය කිරීමකින් තොරව ලබාදීමට ලක්‍ෂ විස්සකට අධික මුදලක් අවශ්‍ය වෙනව. මේ වියදම රඟහල මගින් දරනව. මොකද අපිට ඒක පාඩුවක් වශයෙන් සළකන්න බැහැ. රඟහල නොමිලයේ ලබාදුන්න කියන්නෙ නාට්‍යකරුවාට තමන්ගේ නිර්මාණය වේදිකාගත කරන්න විතරයි තියෙන්නෙ. ඒ නිර්මාණ වෙනුවෙන් පුළුල් ප්‍රචාරයක් අප විසින් ලබාදෙනව. මේ ප්‍රචාරණය තුළින් රඟහලට පැමිණෙන ප්‍රේක්‍ෂකයන් වෙතින් ලැබෙන සමස්ත ආදායම නාට්‍යකරුවාට ලැබෙනව. ඒ අනුව අපි හිතනව මෙවර උළෙලේදී ඔවුන්ට පාඩුවක් සිදු නොවේවි කියල. කොවිඩ් වසංගත කාලයේ සංවිධානය කළ නාට්‍ය උළෙලේදී නාට්‍යකරුවාට සහන දීමනාවක් ලබාදුන්නත් මෙවර එම දීමනාව ලබාදීමට ආර්ථිකමය වශයෙන් ශක්තියක් නැහැ.
● නාට්‍යකරුවන්ගෙන් ලැබෙන සහයෝගය?
මෙවර උළෙල සඳහා නාට්‍ය හැටකට අධික ප්‍රමාණයක් ඉල්ලුම් කළා. ඒ අතරින් නිර්මාණ තෝරාගැනීමට මහාචාර්ය අනුර වික්‍රමසිංහ මහත්මයාගේ ප්‍රධානත්වයෙන් යුත් වියත් කමිටුවක් පත් කළා. එහිදී ගියවර අවස්ථාව ලබා දුන් නාට්‍ය සඳහා මෙවර අවස්ථාව ලබා නොදීමටත්, තරුණ නාට්‍යකරුවන්ට සහ නව නාට්‍ය වලට වැඩි අවස්ථාවක් ලබාදීමටත් කටයුතු කරනු ලැබුවා. ඒ සඳහා නාට්‍යකරුවන් ඉතා හොඳ සහයෝගයක් ලබාදුන්නා.
එල්ෆින්ස්ටන් රඟහල සවස 03.30/06.30
- සින්දුකාර කවිනළුව
- මාරක ළිඳේ සවාරියක්
- Love and Lockdown
- ගුරු තරුව
- සිල්වෙස්ටර් ආයෙමත්
- මනෝ මේඝ
- ඇඳන් කැඩුණු රටක
- Mono Night
- ජූලියස් සීසර්
- කුවේණි
- දැන්වීම ඇලවීම තහනම්
- බෝනිකි ගෙදර 2
- විවේක දිනය
- දෙව්ලෝ දෝණි
- හිතට වැටුණු මිසයිල
- මකරෙක් ඇවිත්
ටවර් රඟහල සවස 03.30/06.30
- මහත්මා?ගාන්ධි.කොම්
- බක්මහ අකුණු
- සඟ වෙද ගුරු ගොවි කම්කරු
- පිරිමියෙක්ගෙන් පැමිණිල්ලක්
- පාරාවෝ සටන් වදී
- හිතුමතේ ආදරේ
- ඊඩිපස්
- හිනාවෙලා මිනිත්තුවක්
- අයියා මලෝ
- Missing
- සූටි ගමරාළ සහ රයිගම් බණ්ඩා
- ප්‍රේමයේ නගරය
- විවේක දිනය
- පොත්ගුල/පීලීස් ලිස්න් ටු මී/ගමනක් යං/නයිට් ඩියුටි
(කෙටි නාට්‍ය)
- ප්‍රේමී කවිනළුව/කිරි අමම්ා අවතාරය/ධර්මිෂ්ඨ සමාජයක්/ආණ්ඩුවේ රස්සාවක් (කෙටි නාට්‍ය)
- හත්පෙති මල
● මහේෂ් එදිරිසිංහ
