සංචාරක ශ්රී ලංකා කණ්ඩායම සහ සත්කාරක නවසීලන්තය අතර වෙලින්ටන් හිදී ඊයේ (17 වැනිදා) ආරම්භ වූ දෙවන ටෙස්ට් ක්‍රිකට් තරගයේ පළමු දිනය නිමාවන විට ප්‍රථමයෙන් පන්දුවට පහරදුන් නවසීලන්ත කණ්ඩායම කඩුලු දෙකක් දැවී ලකුණු 152 ක් ලබා සිටියේය.
වර්ෂාව හේතුවෙන් පන්දුවාර 48 කට පමණක් ඊයේ දිනය සීමා වූ අතර පන්දුවාර 52 ක් ඊයේ දිනයේදී අහිමිව ගියේය.
ඊයේ දිනයේ උදෑසන සිට දිවා ආහාරය දක්වා කාලය වර්ෂාව හේතුවෙන් සම්පූර්ණයෙන්ම තරගයට අහිමිව ගිය අතර තේ පානය සඳහා තරගය නතර කරන විට නවසීලන්ත කණ්ඩායම පන්දු වාර 32කට මුහුණ දී එක් කඩුල්ලක් දැවී ලකුණු 109ක්
රැස්කරගෙන සිටියේය.
තේ පානයෙන් අනතුරුව කාල සීමාව තුළද ශ්රී ලංකා කණ්ඩායමට ක්‍රියාත්මක කළ හැකි වූයේ තවත් පන්දු වාර 16ක් පමණක් වූ අතර මන්දාලෝක තත්ත්වය මත විනිසුරුවරුන් විසින් තරගය ඊයේ දිනයට නතර කරන ලදී.
ශ්රී ලංකා නායක දිමුත් කරුණාරත්න තරගයේ කාසියේ වාසිය දිනා ගැනීමෙන් අනතුරුව පළමුව පන්දුවට පහර දීම සඳහා ටිම් සවුති ගේ නායකත්වයෙන් යුතු නවසීලන්ත කණ්ඩායමට ආරාධනා කළේය.
ශ්රී ලංකාව මෙම තරගයේ දී පන්දු රැකීම සඳහා පිටියට පිවිසියේ නවක ක්‍රීඩක නිශාන් මධුෂ්ක ට ශ්රී ලංකා ටෙස්ට් හිස් වැස්ම මෙන්ම කඩුලු රැකීමේ ආවරණ ද පිරී පිරිනමමිනි.
ඒ අනුව ශ්රී ලංකාව වෙනුවෙන් ටෙස්ට් තරග වරම් ලබාගත් 163 වෙනි ක්‍රීඩකයා ලෙස නිශාන් මදුෂ්ක ඉතිහාසයට එක්වූ අතර ජ්‍යෙෂ්ඨ ක්‍රීඩක ඇන්ජලෝ මැතිව්ස් අතින් මදුෂ්කට ශ්රී ලංකා ටෙස්ට් හිස්වැස්ම පිරිනමන ලදී.
ශ්රී ලංකා නායකයාගේ ආරාධනයෙන් පිටියට පිවිසි නවසීලන්ත ආරම්භක පිතිකරුවෝ ඉතා පහසුවෙන් ලකුණු ලබා ගත් අතර පසුගිය තරගය පැවති ක්‍රයිස්චර්ච් හි හැග්ලි ඕවල් ක්‍රීඩාංගණයේ තණතීරුවටද වඩා මෙම තණතීරුව කොළ පැහැති සෙයක් දිස් වුණි.
එහෙත් එම තණතීරුවේ වාසිය ලබා ගැනීමට ශ්රී ලංකා වේග පන්දු යවන්නන්ට පන්දුවාර 25 කට වඩා පන්දු යවන්නට සිදු වූ අතර තරඟයේ 26 වන පන්දුවාරයේ පළමු පන්දුවේදී නවසීලන්ත කණ්ඩායමේ ආරම්භක කඩුල්ල දවා ගැනීමට කසුන් රාජිත සමත් වූයේය.
කසුන් රාජිත විසින් මැද කෙටී එවන ලද පන්දුවකට ෆුල් පහරක් එල්ල කිරීමට ගිය ටොම් ලේතම් සිය කඩුල්ල පූජා කරමින් ලකුණු විසි එකකට දැවී ගිය අතර ලේතම් එල්ල කළ එම පහර ඩීෆ් ස්ක්වයාර් ලෙග් හි සිටි ප්‍රභාත් ජයසූරිය විසින් උඩපන්දුවක් ලෙස රැක ගන්නා ලදී.
ලේතම් ඊයේ සිය ඉනිම තුළ පන්දු 73කට මුහුණ දී තිබුණු අතර ඉතා සංයමයෙන් පිත්ත හැසිරවූ ඔහු එහිදී ලබාගෙන තිබුණේ ලකුණු 21ක් පමණි.
ලේතම් ට වඩා ආක්‍රමණශීලී පිතිහරඹයක නිරත වූ ඔහුගේ සහායක ආරම්භක පිතිකරු ඩෙවොන් කොන්වේ පන්දු 69කදී සිය අර්ධ ශතකය වාර්තා කළ අතර ඒ වන විට නවසීලන්ත ලකුණු පුවරුව ලකුණු 83ක් ලෙස දිස් වූයේය.
සිය අර්ධ ශතකය සඳහා හතරේ පහර 8ක් ඇතුළත් කළ කොන්වේ දැවී යන විට රැස් කරගෙන තිබුණු ලකුණු සංඛ්‍යාව 78කි.
කොන්වේ ඊයේ තරගයේදී මුහුණ දුන් 108 වැනි පන්දුවේදී දැවී ගිය අතර ධනංජය ද සිල්වා ගේ එම පන්දුවට ඉදිරියට පැන එල්ල කළ පහර උඩපන්දුවක් ලෙස පන්දු යැවූ ධනංජය ද සිල්වා විසින්ම ඉදිරියට පැන රැක ගන්නා ලදී.
හතරේ පහර 13 කින් සමන්විත වූ කොන්වේ ගේ ඉනිම එසේ නිමා වීමෙන් පසුව වමත් පිතිකරු හෙන්රි නිකොලොස් කේන් විලියම්සන් සමග පිටියේ එක්වූහ.
තරගය ඊයේ දිනයට නතර කරන විට කේන් විලියම්සන් නොදැවී ලකුණු 26ක් ද හෙන්රි නිකොලස් නොදැවී ලකුණු 18ක් ද රැස් කරගෙන සිටියහ.
කෙසේ වෙතත් නවසීලන්ත ලකුණු පුවරුව ලකුණු 133 දී හෙන්රි නිකොලොස් විසින් ලබා දුන් උඩ පන්දුවක් කඩුලු රකින ක්‍රීඩක නිශාන් මදුෂ්ක කට රැක ගැනීමට නොහැකි වූ අතර නිකොලොස් ගේ ඉනිම නිමා වනවා වෙනුවට එම පන්දුව නතර වූයේ හතරේ සීමාව ද ඉක්මවා යමිනි.
