භික්ෂුවක ලෙස වෙස් වලාගෙන ගවරගිරිය මහ විදුහලට පැමිණ ඇති චීවරධාරියකු එම විදුහලේ නේවාසිකව ගුරු නිවාසයේ නතර වී සිටින එම විදුහලේ ගුරුවරියක ලෙස සේවය කරන සිල් මාතාවකගේ කාමරයට ගොස් බොරු හැඳුනුම්කම් පෙන්වා ඇගෙන් රුපියල් ලක්ෂයක මුදලක් ඉල්ලා එය නොලැබුණු තැන ඇයට බැණ වැදී ඇගේ අතේ තිබුණු ජංගම දුරකථනය පැහැර ගෙන යෑමට තැත් කළ සිද්ධියක් ගවරගිරිය මහ විදුහලෙන් වාර්තා වේ.
පාසල පටන් ගැනීමට පෙර පෙ.ව.7.30 ට පමණ මෙම සිද්ධිය සිදු වී ඇති අතර එම අවස්ථාවේ ගුරු නිවාසයේ සිට ඇත්තේ මෙම සිල් මැණියන් පමණක් බව පැවසේ. මෙම චීවරධාරියා තමා කිසි දිනෙක දැක නැති නොහදුනන පුද්ගලයෙකු බවත් මෙම සිද්ධිය දුරකථනයෙන් පොලිසියට දැනුම් දීමට තැත් කිරීමේදී තමා අත තිබූ ජංගම දුරකථනය මොහු පැහැර ගත් බවත් එම සිල් මාතාව පොලිසියට කළ ඇති පැමිණිල්ලේ සඳහන් වේ.
මෙම සිද්ධිය සිදු වන අවස්ථාවේ දරුවකු සමග පැමිණ ඇති පියෙක් එය දැක චීවරධාරියාගෙන් ජංගම දුරකථනය උදුරා ගෙන තමාට ආපසු ලබා දුන් බවත් සිල් මාතාව පොලිසියට පවසා ඇත. අයගම සිට ගවරගිරිය ඉංගිරිය බලා ධාවනය වන බස් රථයක පැමිණ ඇති මෙම සැකකාර චීවරධාරියා සිද්ධිය සැලවීමටත් පෙර බස් රථයක නැගී අයගම දෙසට පලා ගෙස් තිබේ. අයගම පොලිසිය විමර්ශන සිදු කරයි.
අයගම – ප්‍රේමසිරි විජේතුංග
