මෙමගින් සමාජ අසහනයක් නිර්මාණය වන බව මහබැංකුව දැනගත යුතුයි – පාඨලී චම්පික රණවක
අලුත් බදු පැනවීමත් පසුගිය වර්ෂවල සල්ලි අච්චු ගැහුවා වගේ වැඩක්
විද්‍යාත්මක සොයා බැලීමකින් තොරව සිදු කරන බදු වැඩිකිරීම් තුළින් ව්‍යාපාර වැසී ගොස්, බදු ඔරොත්තු දිය නොහැකි සමාජ කණ්ඩායම් අතර බරපතළ අසහනයන් වර්ධනය විය හැකි බව 43 සේනාංක නායක, පාර්ලිමේන්තු මන්ත්‍රී පාඨලී චම්පික රණවක මහතා ඊයේ (14 වැනිදා) සඳහන් කළේය.
ආණ්ඩුව අනුගමනය කරන වැරදි ආර්ථික ප්‍රතිපත්ති හේතුවෙන් ඇති හැකි සියලුදෙනා රටෙන් පලාගොස් ශ්‍රී ලංකාව මානව කාන්තාරයක් බවට පත් විය හැකි බව ද හෙතෙම අනතුරු අඟවමින් කියා සිටියේය.
මන්ත්‍රී පාඨලී චම්පික රණවක මහතා එම අදහස් පළකළේ රජය විසින් සිදු කරන ලද බදුවැඩිකිරීම් සම්බන්ධයෙන් අදහස් දක්වමින්ය. මෙහිදී වැඩිදුරටත් අදහස් දක්වමින් පාර්ලිමේන්තු මංත්‍රී පාඨලී චම්පික රණවක මහතා මෙසේද කීවේය.
වැට් බද්ද, ඊට අමතරව පිරිවැටුම් බද්ද වැඩි කරපු ආණ්ඩුව දැන් අලුත් ආදායම් බදු ප්‍රමාණයක් හඳුන්වා දී තියෙනවා. රුපියල් ලක්ෂයට වඩා වැඩි මාසික ආදායමක් ලබන සියලුදෙනාටත්, ඒ වගේම ආයතන, විශේෂයෙන්ම වාණිජ ආයතන සඳහා වූ බදු මුදල් වැඩි කර තියෙනවා. මෙයින් ආණ්ඩුව බලාපොරොත්තු වෙන්නේ, කිසියම් ආකාරයකට තමන්ගේ ආදායම් වැඩි කරගැනීම විය හැකියි.
ඇති නැති සියලු දෙනාටම බදු පනවනවාට වඩා ආණ්ඩුව තර්ක කරන්නේ අපි තියෙන අයගෙන් ගන්න යන ක්‍රියාවලියක් තමයි මේ ආරම්භ කරලා තියෙන්නේ කියලා. නමුත් අපි එකක් මතක තබා ගත යුතුයි. මේ සෑම බද්දකම සමාජ වියදමක්. සමාජ අසහනයක් තියෙනවා. පසුගිය කාලයේ ආණ්ඩුවේ ප්‍රතිපත්ති නිසා, විශේෂයෙන්ම රාජපක්ෂලාගේ ප්‍රතිපත්ති නිසා මිනිස්සුන්ගේ අතේ තිබෙන සල්ලිවල වටිනාකම දියවෙලා ගියා. 2019 දි රුපියල් ලක්ෂයක් තිබුණු කෙනෙක්ගේ අද ඒ වටිනාකම රුපියල් තිස්දාහට වැටිලා තියෙනවා. ඒ නිසා රුපියල් ලක්ෂෙට බදු ගහනවා කියන්නේ, ඒ ආකාරයට වටිනාකම් අහිමි කරපු තවත් බද්දක් එකතු කරලා ඒ වටිනාකම් උදුරා ගැනීමක් පමණයි.
ඉහළ ගණයේ පිරිස්වලින් බදු අය කර ගැනීම ගැන මේ රටේ කිසිම විවාදයක් නෑ. කෙසේ නමුත් මේ රුපියල් ලක්ෂය කියන එක බැලූ බැල්මට ලොකු ගාණක් හැටියට පෙනුනට මේක මේ රටේ රජයේ සේවකයන් අති බහුතරයකටත් පුද්ගලික අංශයේ සේවකයන් අති බහුතරයකටත් බලපාන දෙයක්. ඒ වගේම සුළු හා මධ්‍ය පරිමාණ කර්මාන්ත දැනටමත් දැවැන්ත පොලී අනුපාතයකට 30% ක පමණ, ඊට අමතරව 15% ක වැට් බද්දකට, 2.5% ක පිරිවැටුම් බද්දකට,හසුවෙලා, කුඩුපට්ටම් වෙලා යන අතරේ, මේ බදු ක්‍රියාවලියෙනුත් සිද්ධ වෙන්නේ ආණ්ඩුවේ ආදායම වැඩි වෙනවාට අමතරව ඉදිරි කාලයේ ආණ්ඩුවට ව්‍යාපාර ටික වැහී ගිහිල්ලා කිසිම ආදායමක් නැති වෙන තත්වයක් ඇතිවීම පමණයි.
ආණ්ඩුවට ඇයි මේ වෙලා තියෙන්නේ? ආණ්ඩුවට අද රජයේ පඩි ගෙවා ගන්න විදිහක් නැහැ. ඔක්තෝම්බර් මාසයේ ඉතාම අසීරු මාසයක් ආණ්ඩුවට. නොවැම්බර් මාසය ගැන හිතාගන්නවත් බැහැ. දෙසැම්බරය ගැන බලාපොරොත්තුවක් ඇත්තෙම නැහැ.
2020-21 වර්ෂවලදී පිස්සු බල්ලෝ රැලක් වගේ මහ බැංකුවේ අධිපති මුදල් ඇමති, ජනාධිපතිවරු සල්ලි අච්චු ගහලා කළා වගේම ක්‍රියාවලියක් දැන් මේ අනිත් පැත්තට මහ බැංකුවේ අධිපතිවරයා, මුදල් ඇමතිලා, ජනාධිපතිලා කරගෙන යන්නේ. කිසිම ආකාරයකට ඔරොත්තු නොදෙන සමාජ කණ්ඩායම්වලට තවදුරටත් මේ බදු බර පැනවීම. මෙහි කිසියම් සීමාවකදී මිනිස්සු නැවත වතාවක් නැගිටින්න පුළුවන් කියන එක පමණක් අපි මතක තබා ගත යුතුයි. ඒ මගින් රටට ඇති කරන්න නියමිත විනාශය, ව්‍යසනය ඉතාම විශාලයි. ඒ නිසා කවර බද්දකට පෙර හෝ සමාජයේ තත්වය පිළිබඳ වැදගත් ඇගයීමක් නොකොට එය සිදුකිරීම බරපතළ වරදක්. මොකද වසර තුනෙන් තුනට කුටුම්භ පරිභෝජනය පිළිබඳව දත්ත ප්‍රමාණයක්, විශ්ලේෂණයක් සංඛ්‍යාලේඛන දෙපාර්තමේන්තුව කරනවා. වසර දහයෙන් දහයට විධිමත් ජන සංගණනයක් කරනවා. ඒ එකක්වත් නොකොට ඒ සමාජයට මොකද වුනේ කියලා හොයන්නේ බලන්නේ නැතුව බදු වැඩි කරලා. පහුගිය අවුරුදු තුන ඇතුලේ කෝවිඩ් සහ මේ ආර්ථික බංකොලොත්භාවය තිබුණා. මේ බදු ක්‍රියාදාමයන් මගින් සිද්ධවෙන්නේ විනාශය තවත් වැඩිදියුණු කිරීමක්.
විශේෂයෙන්ම දැනටමත් පහළ මධ්‍යම පන්තිය දුගී දුප්පත් පන්තිය බවට පත්වෙමින් තිබෙනවා. පහළ මධ්‍යම පන්තිය දුගී පන්තියක් බවට පත්වීමත් ඉහළ මධ්‍යම පන්තිය පහළ මධ්‍යම පන්තියටත් වැටිලා. සමාජය තුළ බරපතල අසහනයක් ඇති වෙලා. ඇති හැකි සියලු දෙනා රටෙන් පලා ගිහිල්ලා රට මානව කාන්තාරයක් බවට පත්වීම විතරයි. ඒ නිසා මහ බැංකුවත් මුදල් අමාත්‍යාංශයත් මතක තබාගන්න ඕන ගන්නා සෑම බදු පියවරක් මතම සමාජ වියදමක් තියෙනවා. ඒ වගේම සමාජ අසහනයක් නිර්මාණය වෙනවා. එය දේශපාලන අර්බුදයක් බවට පත්වෙනවා කියන එක. ඒ නිසා විද්‍යාත්මක ආකාරයට මේ කටයුත්ත කිරීම, සමාජ සාධාරණත්වයේ මූලධර්ම වලට අනුව මේ කටයුත්ත කිරීම ගැන මීට වඩා පුළුල් සංවාදයක් රටට අවශ්‍යයි.
සිරිමන්ත රත්නසේකර
