සාර්ථකත්වය කියන්නෙ ඔබ කොතරම් ඉහළට ගියාද කියනෙකම නොවෙයි. ඔබ ලෝකයට ධනාත්මක වෙනසක් කරන්නේ කෙසේද යන්නයි.
ධනාත්මක ආකල්පයක් පුද්ගලයකුට එදිනෙදා ජීවිතයේ කටයුතු සමග වඩාත් පහසුවෙන් මුහුණ දීමට උපකාරී වන බව ඔබ දන්නවද? එය ඔබේ ජීවිතයට ශුභවාදී බවක් ගෙන දෙන අතර ම, කරදර සහ නිෂේධාත්මක සිතුවිලි වළක්වා ගැනීම පහසු කරනවා මෙන්ම ඔබ එය ජීවන මාර්ගයක් ලෙස නැතහොත් පුරුද්දක් ලෙස අනුගමනය කරන්නේ නම්, එය ඔබේ ජීවිතයට නිර්මාණාත්මක වෙනස්කම් රාශියක් ගෙන එනු ඇති අතර, ඒවා ප්‍රීතිමත්, දීප්තිමත් හා වඩා සාර්ථක ජීවිතයක් ඔබට ළඟාවීම සනිටුහන් කරන්නකි.
ධනාත්මක ආකල්පයකින් ඔබ ජීවිතයේ දීප්තිමත් පැත්ත හෙවත් ජීවිතයේ සුදු පැතිකඩ දකියි. එම නිසා පුද්ගලයකු වශයෙන් ඔබ සෑම විටම ශුභවාදී වන්න, හොඳම දේ සිදුවනු ඇතැයි අපේක්‍ෂා කරන්න. එය නිසැකව ම වර්ධනය වීමට සුදුසු මානසික තත්ත්වයක් ඔබ තුළ ඇති කරයි.
ස්ත්‍රී පුරුෂ භේදයකින් තොරව ඔබ තුළ පවතින්නේ ධනාත්මක චින්තනය ද නැතහොත් ඍණාත්මක චින්තනය ද යන්න ඔබට ඔබ තුළින්ම හඳුනා ගැනීමට හැකියි. එවැනි පුද්ගලයන් තුළ දැකිය හැකි ලක්‍ෂණ බොහෝ පවතින අතර කිහිපයක් ලෙස, සෑම විටම ධනාත්මක මෙන්ම නිර්මාණාත්මක චින්තනයෙන් යුතු සුබවාදී වේ.
දේවල් කිරීමට සහ ඉලක්ක සපුරා ගැනීමට පෙළඹවීම සහ ශක්තිය පවතී.
සතුට පිළිබඳ ආකල්පයක්.
බලාපොරොත්තු වන්නේ සාර්ථකත්වය මිස අසාර්ථකත්වය නොවේ.
ඔබට ආශ්වාදයක් දැනීම.
ඔබේ ගමනේදී ඔබට බාධා පැමිණියහොත් එය අත් නොහැරීමට ශක්තිය ලබාදෙයි.
අසාර්ථකත්වය සහ ගැටලු වෙස්වලාගෙන සිටින ආශිර්වාදයක් ලෙස ඔබ දෙස බලයි.
ඔබ ගැන සහ ඔබේ හැකියාවන් ගැන විශ්වාස කිරීම.
ආත්ම අභිමානය සහ විශ්වාසය පෙන්වීමට ඔබට ඉඩ සලසයි.
ඔබ ප්‍රශ්න ගැන සිතනවා වෙනුවට විසඳුම් සොයයි.
ඔබ අවස්ථා දැක හඳුනා ගනී.
විශේෂයෙන් ම ධනාත්මක චිත්තවේග අත්විඳින පුද්ගලයකුට බොහෝ ප්‍රතිලාභ හිමිවන බව ඔබ දන්නවාද? ඒවා මානසික, සෞඛ්‍ය, මනෝවිද්‍යාත්මක සහ සමාජීය වශයෙන් අත්විඳින්නට පුළුවන්.
මනෝවිද්‍යාත්මක ප්‍රතිලාභ – ධනාත්මක පුද්ගලයන්ට වැඩි ශක්තියක් ඇති අතර වඩාත් ආත්ම විශ්වාසයෙන් හා බලාපොරොත්තු සහගත වේ. මේ නිසා ඔවුන් ඉහළ ඉලක්ක තැබීමට නැඹුරු වන අතර ඔවුන්ගේ ඉලක්ක කරා ළඟා වීමට වැඩි උත්සාහයක් දරයි. ඔවුන් ට පසුබෑම් තත්ත්වයක් වඩාත් ඔරොත්තු දෙන අතර, පසුබෑම් නොතකා ආපසු නැගීසිටීමට සහ නොපසුබට උත්සාහයට උපකාර කරයි.
මානසික ප්‍රතිලාභ – තර්ජනයකට ප්‍රතිචාර දැක්වීමට උපකාර කිරීම සඳහා ඍණාත්මක බව අපගේ අවධානය පටු කරන අතර, ධනාත්මක බව කරන්නේ ඊට ප්‍රතිවිරුද්ධ දෙයකි. එය අපට විවෘත කරයි, මනසට එන අදහස් පරාසය පුළුල් කරන අතර මෙය ධනාත්මක පුද්ගලයන්ට ගැටලු සඳහා බහුවිධ විසඳුම් දැකීමට සහ වඩා හොඳ තීරණ ගැනීමට උපකාරී වේ. එය වඩාත් නිර්මාණශීලීත්වයට ද හේතු වේ. එවිට ප්‍රීතිමත් මෙන්ම බුද්ධිමත් මිනිසකු නිර්මාණය කරයි.
සමාජ ප්‍රතිලාභ – ධනාත්මක චිත්තවේගයන් අත්විඳින විට මිනිසුන්ට අන් අය සමග වැඩි සම්බන්ධයක් දැනේ. මෙය පුද්ගලික වර්ධනය, නිර්මාණශීලීත්වය, අභිප්‍රේරණය සහ ඵලදායිතාවයට සම්බන්ධ උසස් තත්ත්වයේ සබඳතාවලට මඟ පාදනවා. උසස් තත්ත්වයේ සම්බන්ධතා ඇති පුද්ගලයන් වැඩි තොරතුරු හුවමාරු කර ගන්නා අතර ඔවුන්ගේ උත්සාහයන් සම්බන්ධීකරණය කිරීමට වඩා හොඳ වන අතර ගැටුම් අඩු වේ.
සෞඛ්‍ය ප්‍රතිලාභ – ධනාත්මක පුද්ගලයන් ශාරීරිකව සෞඛ්‍ය සම්පන්න වේ. ඔවුන්ට අඩු රුධිර පීඩනය, අඩු හෘද ස්පන්දන වේගය, ආතතියට සම්බන්ධ හෝමෝන අඩු මට්ටම් සහ ශක්තිමත් ප්‍රතිශක්තිකරණ පද්ධතියක් ඇත. ධනාත්මක බව හෘදයාබාධ, ආඝාතය සහ දියවැඩියාව ඇතිවීමේ සම්භාවිතාව අඩු කරයි. වඩා ධනාත්මක චිත්තවේගයන් අත්විඳින පුද්ගලයන් වඩා හොඳින් නිදා ගනී, අඩු කනස්සල්ල සහ අඩු සෙම්ප්‍රතිශ්‍යාව ඇති අතර, මේ සියල්ල ඵලදායිතාවය වැඩි දියුණු කරයි.
මේ ආකාරයට පුද්ගලයකුට ධනාත්මක ආකල්පයක් සතුට හා සාර්ථකත්වයට මඟ පෙන්වන අතර ඔබේ මුළු ජීවිතයම වෙනස් කළ හැකිය. ඔබ ජීවිතයේ දීප්තිමත් පැත්ත දෙස බැලුවහොත්, ඔබේ මුළු ජීවිතයම ආලෝකයෙන් පිරී යයි. මෙම ආලෝකය ඔබට සහ ඔබ ලෝකය දෙස බලන ආකාරය කෙරෙහි පමණක් නොව, එය ඔබගේ පරිසරයට සහ ඔබ අවට සිටින පුද්ගලයන්ට ද බලපායි.
දවසක ඔබේ මෙම ආකල්පය ප්‍රමාණවත් තරම් ශක්තිමත් නම්, එය බෝ වේ. එය හරියට ඔබ වටා ආලෝකය විහිදුවාක් මෙනි. ඉතිං ඔබේ සිතේ ඇති බිය නිසා ඔබ පසුබෑමට ලක් නොවෙන්න. ඔබේ හදවතේ ඇති සිහින මගින් ඔබේ ආකල්ප මෙහෙයවන්න…
එස්. සජිනි නිමේෂා
ජනසන්නිවේදන අධ්‍යනාංශය
කැලණිය විශ්වවිද්‍යාලය
සංස්කරණය – වසන්ත ලියනගේ
