පාස්කු ප්‍රහාරය සම්බන්ධයෙන් මෙතෙක් සිදු කර ඇති විමර්ශන ගැන පාර්ලිමේන්තු මන්ත්‍රීවරුන් දැනුවත් කිරීමට මහජන ආරක්ෂාව පිළිබඳ අමාත්‍යංශය තීරණය කර ඇත.
ඒ අනුව ලබන 19 වැනිදා පාර්ලිමේන්තු සංකීර්ණයේදී මෙම දැනුවත් කිරීමේ වැඩසටහන පැවැත්වීමට කටයුතු යොදා ඇතැයි ආණ්ඩු පක්ෂයේ ප්‍රධාන සංවිධායක සහ නාගරික සංවර්ධන ඇමැති ප්‍රසන්න රණතුංග මහතා ‘දිවයින ඉරිදා සංග්‍රහය’ට පැවසීය. මෙම දැනුවත් කිරීමේ වැඩසටහනට උසස් පොලිස් නිලධාරීන් සහභාගි වන බව ද ඇමැතිවරයා සඳහන් කළේය.
මෙලෙස දැනුවත් කිරීම සිදුකරන්නේ පාස්කු ප්‍රහාරය සම්බන්ධව පාර්ලිමේන්තුවේ දී ලබන 21 සහ 22 යන දෙදින පැවැත්වෙන කල්තැබීමේ විවාදයට අදාළව මන්ත්‍රීවරුන්ට අවශ්‍ය තොරතුරු දැනගැනීම සඳහා අවස්ථාව උදාකරමින් බව ද ඇමැතිවරයා කීවේය.
උපාලි ද සේරම්
