පසුගිය ඇසළ පෝය නිමිතිකර හෝමාගම බ්‍රාහ්මනගම බෝගහලන්ද ප්‍රදේශයේ තරුණ පිරිසක් සංවිධානය කරන ලද හොල්මන් මන්දිරයේ හොල්මන් කළ තරුණයන් හය දෙනකු එකවර සිහිවිකල් වූ පුවතක් එම ප්‍රදේශයෙන් වාර්තා වේ.
ඇසළ පෝය නිමිතිකර පසුගිය 03 වැනිදා ආරම්භ කළ එම හොල්මන් මන්දිරය “මහසෝන් අඩවිය” ලෙස නම්කර තිබිණි.
පසුගිය 07 වෙනිදා දක්වා පැවැත්වීමට නියමිතව තිබූ එම හොල්මන් මැඳුර නැරඹීමට අවසන් දින අතිවිශාල පිරිසක් පැමිණ තිබේ. එකවර දෙදෙනකුට පමණක් ඇතුල් විය හැකි ලෙස සැලසුම් කර තිබූ හොල්මන් මන්දිරයට ඇතුළුවීමට රුපියල් 50 ක මුදලක් අය කරන ලදී.
ශබ්ද විකාශන යන්ත්‍ර ඔස්සේ විකාශනය කෙරෙන බෙර ඔස්සේ හොල්මන් මන්දිරයට ඇතුළු වන අය බියගැන්වීමට තරුණයන් හය දෙනකු නොයෙකුත් ක්‍රියාකාරකම්වල යෙදෙති.
මෙසේ එම සිදුවීම් සිදුවෙද්දී අවසන් දිනය වූ පසුගිය 07 වෙනිදා රාත්‍රී 10.30 ට පමණ මන්දිරය තුළ හොල්මන් කරමින් සිටි තරුණයන් හයදෙනා එකවර සැබවින්ම සිහි විකල්ව හැසිරෙන්නට වූයෙන් සංවිධායකයෝ කලබලයට පත්විය. මේ වන විට හොල්මන් මන්දිරය නැරඹීමට අවස්ථාව එන තුරු පෝලිමේ සිටි පන්සියකට අධික පිරිසක් සිදුවන්නේ කුමක්දැයි විමසිලිමත්ව බලා සිටින්නට විය.
දෙවොල් මඩු ශාන්තිකර්ම වල වැයෙන පටිගත කළ බෙරහඬ ශබ්ද විකාශන යන්ත්‍ර ඔස්සේ ගිගුම් දෙද්දී සංවිධායකයෝ කලබලයට පත්වූහ.
ප්‍රදේශයේ පන්සලේ හාමුදුරුවන් මෙන්ම යකැදුරන් කීප දෙනකුම කැඳවීමට කටයුතු කළ සංවිධායකයන් පැය තුනක පමණ කාලයක් තුළ සිදුකළ යන්ත්‍ර මන්ත්‍ර ගුරුකම් හා හාමුදුරුවන්ගේ සෙත් පිරිත් සජ්ජායනා මධ්‍යයේ සිහිවිකල් වූ හයදෙනා පියවි සිහිය ලැබුවද එක් අයකු හෝමාගම රෝහල වෙත යොමු කරවීමට සිදුවූ බව පැවසේ.
ඇන්ටන් ප්‍රනාන්දු
