ජනතා විරෝධයට ලක්වූවන් කැබිනට්ටුවට පත්කිරීමට බලපෑම් කිරීම කුමන්ත්‍රණයක්!
පොදු ජනතාවගේ දැඩි විරෝධයට ලක්වූවන් නැවත ඇමැති මණ්ඩලයට පත් කරන ලෙස බලපෑම් එල්ල වීම බරපතළ කුමන්ත්‍රණයක් විය හැකි බවත් එබැවින් ජනාධිපතිවරයා අදහස් කර ඇති ආර්ථික, දේශපාලනික හා සමාජමය වැඩපිළිවෙළ කඩිනමින් ක්‍රියාත්මක කරන ලෙස ඉල්ලා නව ලංකා නිදහස් පක්ෂයේ නායක කුමාර වෙල්ගම මහතා ජනාධිපති රනිල් වික්‍රමසිංහ මහතාට ලිපියක් යොමු කර ඇත.
ජනාධිපතිවරයාගේ වැඩපිළිවෙළ සාර්ථක වීමෙන් සිදුවන හානිය පිළිබඳව පූර්ව නිගමනයකට පැමිණ ඇති කෙනෙකු හෝ කිහිප දෙනෙකු ඒ මහතා සම්බන්ධයෙන් අප්‍රසාදය ඇති කර නැවත බලය ලබා ගැනීම සඳහා කුමන්ත්‍රණයක් ක්‍රියාත්මක කර තිබිය හැකි බවත් එකී ලිපියෙහි දැක්වේ.
එබැවින් ජනතාව ප්‍රතික්ෂේප කළ පිරිසකට වරප්‍රසාද හෝ රැකවරණ ලබාදී අප්‍රසාදයට ලක් නොවිය යුතු බවත් එවැනි පිරිසක් පත්කිරීමට ජනතාව මෙන්ම පාර්ලිමේන්තුවේ බහුතර මන්ත්‍රීවරුන් විරුද්ධ බවත් නව ලංකා නිදහස් පක්ෂයේ නායක කුමාර වෙල්ගම මහතා ජනාධිපතිවරයාට යොමු කළ ලිපියේ සඳහන් වේ.
එසේම නීතියේ ආධිපත්‍යය තහවුරු කර ඕනෑම තරාතිරමේ අයකුට වුව ද නීතිය ක්‍රියාත්මක කළ යුතු බවත් එහි තවදුරටත් සඳහන් වේ.
සිරිමන්ත රත්නසේකර
