ධීවර ප්‍රජාවගේ ඉන්ධන අවශ්‍යතාවය වෙනුවෙන් අද දිනය තුළ භුමිතෙල් බවුසර් 74 ක් නිකුත් කිරීමට කටයුතු කර ඇති බවත් එම ඉන්ධන පෞද්ගලික අංශයේ පිරවුම්හල් 49 ක්, සමූපකාර පිරවුම්හල 18 ක් සහ වෙනත් පිරවුම්හල් 07 කින් බෙදාහැරීම සිදු කරන බවත් ප්‍රජා කටයුතු පිළිබඳ ජනාධිපති අධ්‍යක්ෂ ජෙනරාල් කීර්ති තෙන්නකෝන් මහතා පවසයි.
ඒ අනුව වත්තල හැඳල, බේරුවල (ධිවර වරාය), හැඳළ විජේසිංහ, ගාල්ල, අහුන්ගල්ල, තංගල්ල, නොරොච්චෝල, පුත්තලම, හලාවත වැල්ල, හලාවත අලු‍ත්වත්ත, වැල්වැටිතුරේ, පුදුකුඩුඉරිප්පු, කයිට්ස්, ගුරුනගර්, තලයාඩි, මයිලෙඩ්ඩි, කලවංචිකුඩි ඇතුළු ස්ථාන රැසකට භුමිතෙල් බවුසර් තොග 28ක් නිකුත් කර ඇත.
මීට අමතරව ධීවර දෙපාර්තමේන්තුව විසින් ක්‍රියාත්මක කරන ධීවර වරාය 14 ක ද භුමිතෙල් හා ඩීසල් ඉන්ධන ධීවරයින් වෙත නිකුත් කිරීම අඛණ්ඩව සිදු කෙරෙන බව ද ඒ මහතා සඳහන් කරයි.
එසේම ධීවරයින්ගේ අවශ්‍යතා සඳහා ඉන්ධන සැපයීමේ වගකීම නොවැම්බර් 22 වන දින සිට දකුණ, බස්නාහිර, වයඹ, උතුර සහ නැගෙනහිර පළාත් ප්‍රධාන ලේකම්වරුන් සහ දිස්ත්‍රික් ලේකම්වරුන්ගේ සෘජු අධීක්ෂණය යටතේ සිදු කෙරෙන බවත් ගාල්ල, මාතර, හම්බන්තොට, කළුතර, කොළඹ, ගම්පහ, පුත්තලම, යාපනය, මන්නාරම, කිලිනොච්චි, මුලතීව්, ත්‍රිකුණාමය, මඩකළපුව සහ අම්පාර දිසාපතිවරුන් මගින් ද, ධීවර දෙපාර්තමේන්තුව මගින් ද ධීවරයින්ගේ ඉන්ධන අවශ්‍යතා විමසා බලන බවත් පවසයි.
ධීවර කටයුතු සඳහා ඉන්ධන ලබා ගැනීමේ දුෂ්කරතාවක් පවතී නම් ධීවර සමිති හා ව්‍යාපාරිකයින්ට අදාළ දිස්ත්‍රික්කයේ දිසාපතිවරයා හෝ පළාත් ප්‍රධාන ලේකම්, සමූපකාර ලේකම් වෙත ඉල්ලීම් යොමු කරන ලෙස ජනාධිපති ප්‍රජා කටයුතු අංශය වැඩි දුරටත් දැනුම් දී තිබේ.
තවද මේ දක්වා භුමිතෙල් බෙදීම සිදු නොකළ සමූපකාර පිරවුම්හල් 18ක් මගින් ද භුමිතෙල් නිකුත් කිරීමට කටයුතු කර ඇති අතර පළාත් සමූපකාර කොමසාරිස්වරුන් හා ලේකම්වරුන්ගේ නිර්දේශ මත අවශ්‍ය මූල්‍ය පහසුකම් සමූපකාර ග්‍රාමීය බැංකු මගින් ලබා දී ඇති බවත් පවසයි.
ධීවර ප්‍රජාව වෙත ඉන්ධන බෙදා හැරීම පිළිබඳ අධීක්ෂණය හා මෙහෙයවීම පළාත් ප්‍රධාන ලේකම්වරු සහ දිසාපතිවරු වෙත පවරා ඇති බවත්, ඒ අනුව හෙට( 24දා) වන විට ධීවරයින් වෙත භුමිතෙල් සැපයීම සම්පූර්ණයෙන්ම යථා තත්ත්වයට පත්වනු ඇති බවටත් කීර්ති තෙන්නකෝන් මහතා විශ්වාසය පළ කළේය.
