වසරකුත් මාස 4කට ආසන්න කාලයකින් පසුව ශ්‍රී ලංකා පාපන්දු කණ්ඩායම ජාත්‍යන්තර තරග පිටියට පා තබමින් යේමනය සමග අද (12 වැනිදා ) තරග වැදීමට නියමිතය.
ලෝක කුසලාන සහ ආසියානු කුසලාන සුදුසුකම් ලැබීමේ තරග යටතේ සෞදි අරාබියේ ප්‍රින්ස් සුල්ටාන් බින් අබ්දුල් අසිස් ක්‍රීඩාංගණයේදී ශ්‍රී ලංකා වේලාවෙන් රාත්‍රී 10.30ට එම තරගය ආරම්භ වේ.
එම තරගය සඳහා ශ්‍රී ලංකා කණ්ඩායම පසුගිය 09 වැනිදා සෞදි අරාබිය බලා පිටත්ව ගිය අතර අද පැවැත්වෙන තරගයේදී ශ්‍රී ලංකා කණ්ඩායම මෙහෙයවීමේ වගකීම චරිත් රත්නායකට පවරා තිබේ.
අදාළ තරගාවලි සඳහා සුදුසුකම් ලබාගැනීම නිමිත්තෙන් පැවැත්වෙන ඊළඟ තරගය ලබන 17 වැනිදා කොළඹ දී පැවැත්වෙන අතර එම තරගයේදී ශ්‍රී ලංකා කණ්ඩායම මෙහෙයවනු ලබන්නේ හර්ෂ ප්‍රනාන්දු විසිනි.
වසරකට ආසන්න කාලයක් ජාත්‍යන්තර තහනමකින් පසුව ශ්‍රී ලංකාව මුහුණදෙන පළමු ජාත්‍යන්තර තරගය මෙය වන අතර 2022 වසරේ ඔක්තෝම්බර් මස ශ්‍රී ලංකාව අරඹයා පනවනු ලැබූ එකී තහනම පසුගිය මාසයේදී ඉවත් කෙරිණි.
ශ්‍රී ලංකා කණ්ඩායම අවසාන වශයෙන් ජාත්‍යන්තර තරගයකට මුහුණ දී තිබුණේ 2022 වසරේ ජුනි මස 14 වැනිදා මාලදිවයිනට එරෙහිවය.
එම තරගයෙන් 1-0 ක පරාජයක් ශ්‍රී ලංකාවට අත් වූ අතර යේමනය සහ ශ්‍රී ලංකාව අතර මෙතෙක් පවත්වා ඇති ජාත්‍යන්තර පාපන්දු තරග 7 ක් පවත්වා ඇති අතර ඉන් තරග 4 ක් ශ්‍රී ලංකාව ජයගෙන තිබේ.
තරග දෙකක් ශ්‍රී ලංකාව පරාජයට පත්ව ඇති අතර එක් තරගයක් විසඳුමකින් තොරව නිමා වී තිබේ.
එහෙත් ආසන්නතම ශ්‍රේණිගත කිරීම් අනුව ශ්‍රී ලංකාව 202 ස්ථානයේ සහ යේමනය 156 වැනි ස්ථානයේ රැඳී සිටී.
යේමනය සමග පැවැත්වෙන මෙම තරග දෙකම ජයග්‍රහණය කොට ශ්‍රී ලංකාව දෙවන වටය සඳහා සුදුසුකම් ලැබුවහොත් ශ්‍රී ලංකා කණ්ඩායමේ එක් ක්‍රීඩකයෙකුට රුපියල් 750000 බැගින් පිරිනැමීමට ශ්‍රී ලංකා පාපන්දු විධායක කමිටුව තීරණය කොට ඇත.
ශ්‍රී ලංකා පාපන්දු සංචිතය –
චරිත් රත්නායක (නායක) හර්ෂ ප්‍රනාන්දු, චලන චමීර, සුජාන් පෙරේරා, ප්‍රභාත් අරුණසිරි, අසිකුර් රහමන්, මොහොමඩ් අමාන්, කවීෂ් ප්‍රනාන්දු, ෂෙනාල් පිංගෝ, මරියතස් නිතාර්ශන්, නව්ෂාඩ් මොහොමඩ්, ජූඩ් සුපුන්, ෆයිසාල් රසීක්, ෆයිසාල් රසීම්, වසෙම්ඩ්, වසීම් ආකිඩ්, මොහොමඩ් ෂබීර්, චමෝද් ඩිල්ෂාන්, රිෆ්ඛාන් මොහොමඩ්, කවිඳු ඉෂාන්, නයිසර් මොහොමඩ්, සෙනාන් ද සිල්වා සහ ඒරිස් මොහොමඩ්.
කුෂාන් සුබසිංහ
