වසර 30ක් පැවැති එල්ටීටීඊ ත්‍රස්තවාදය මුලින් උපුටා දැමුවද රටේ සෞඛ්‍ය ක්ෂේත්රය මේ වන විට ත්‍රස්තවාදයක් වී ඇති බව විපක්ෂ නායක සජිත් ප්‍රේමදාස මහතා පැවසීය.
වංචාව, හොරකම, අක්‍රමිකතාව, ගුණාත්මකභාවයෙන් අඩු සහ බාල බෙහෙත්, වෛද්‍ය උපකරණ ගෙන්වීම මෙන්ම රටට තොරතුරු සැඟවීම, ඇත්ත කතාකරන වෛද්‍ය ක්ෂේත්‍රයේ විවිධ වෘත්තිකයන් දඩයම් කිරීම, ආදී සියලු උපක්‍රම උපයෝගී කර ගෙන නිදහස් සෞඛ්‍ය ප්‍රතිපත්තිය විනාශ කරන වැඩපිළිවෙළක ද රජය නිරත වන බවත් එය ත්‍රස්තවාදී ක්‍රියාවකට සමාන බවත් විපක්ෂ නායක සජිත් ප්‍රේමදාස මහතා පෙරේදා (13 දා) පැවසීය. එහිදී මෙම සියල්ල ලක්ෂ 220ක්වූ ජනතාවගේ කරපිටින් ගොස් ඇති බවද ඔහු කීය.
රට මේ වන විට මුහුණ දී ඇති ගැටලු සම්බන්ධයෙන් සාකච්ඡා කිරීමට සහ රටට සත්‍ය හෙළි කිරීමේ අරමුණ පෙරදැරිව ඉතිහාසයේ ප්‍රථම වතාවට පාර්ලිමේන්තුව තුළ විපක්ෂ නායකවරයකු විසින් කමිටුවක් ස්ථාපිත කරමින් මේ බව කීය.
මෙම කමිටුව හරහා දූෂණ වංචාවලට වැට බැඳීම, සුසමාදර්ශී පාලනයක් උදෙස් විධිවිධාන සැකසීම, ඒ ඒ ක්ෂේත්‍රවල ගත යුතු ක්‍රියාමාර්ග ගැන අවධානය යොමු කිරීම මෙන්ම විවිධ ක්ෂේත්‍රවල පැන නැගී ඇති ගැටලු පිළිබඳ සාකච්ඡා කිරීම සිදු වේ. හුදු දේශපාලන න්‍යාය පත්‍රයකින් තොරව රටට සත්‍ය හෙළිදරව් කිරීම මෙම කමිටුවේ මුඛ්‍ය අරමුණ බව මෙහි දී අදහස් දක්වමින් ප්‍රේමදාස මහතා පැවසීය.
මෙම අවස්ථාවට පාර්ලිමේන්තු මන්ත්‍රීවරුන් පිරිසක් මෙන්ම රජයේ විකිරණ විද්‍යා තාක්ෂණවේදීන්ගේ සංගමය, රජයේ ඖෂධවේදීන්ගේ සංගමය, සිවිල් අයිතිවාසිකම් සදහා වූ වෛද්‍ය වෘත්තිකයන්ගේ සංගමය, සෞඛ්‍ය වෘත්තීයවේදීන්ගේ ආයතනය යනාදිය නියෝජනය කරමින් නියෝජිත පිරිසක් ද එක්ව සිටියහ.
බෙහෙත් ගෙන්වීමේ දී ප්‍රසම්පාදන ක්‍රමවේදය අනුගමනය කළ යුතු බවට පනතේ සඳහන්ව තිබුණත් එය නොසලකා විශේෂ අවස්ථාවක් යැයි ප්‍රකාශ කරමින් පනතේ 109 වගන්තිය උපයෝගී කර ගෙන මිනිසුන්ගේ මළකදන් මතින් ව්‍යාපාර කරන බවත් එහි ප්‍රතිඵලයක් ලෙස බාල නිර්වින්ධන ඖෂධ ලබා දීම නිසා පසුගිය කාලයේ දරුවන්ගේ, පුරවැසියන්ගේ ජීවිත රැසක් නැති වූ බවත් විපක්ෂ නායකවරයා මෙහි දී සඳහන් කළේය.
අද වන විට පිළිකා රෝගීන්ට අවශ්‍ය ගුණාත්මක භාවයෙන් ඉහළ උපකරණ ලබා ගැනීමට සෞඛ්‍ය අමාත්‍යාංශය මැලි වී පැරණි උපකරණ භාවිත කරන බවත් සෞඛ්‍ය ක්ෂේත්‍රයේ වෘත්තිකයන් මේ නිසා රට අතහැර යන බවත් සිටින වෘත්තිකයන් රජය දඩයම් කරන බවත් පැවසීය. එසේ ම ජාතික ඖෂධ නියාමන අධිකාරියේ විශේඥවරු 23ක් ඉන් ඉවත් කර තොරතුරු සඟවා ඇති බවත් සමහර වෛද්‍යවරුන් තොරතුරු ඉදිරිපත් කරන විට ඔවුන්ගේ වැඩ තහනම් කර ඇති බවත් විපක්ෂ නායකවරයා තවදුරටත් මෙහි දී සඳහන් කර සිටියේය.
තොරතුරු දැන ගැනීමේ අයිතිය ඇති රටක සෞඛ්‍ය අමාත්‍යාංශය තොරතුරු සඟවන බවත් පැවසූ විපක්ෂ නායකවරයා කියා සිටියේ මේ රටේ ජනතාවගේ සෞඛ්‍ය සම්පන්නභාවය තහවුරු කිරීමට රට වෙනුවෙන් මහජනතාව වෙනුවෙන් ඇත්ත කතා කරන්න ඉදිරිපත් වන සෞඛ්‍ය වෘත්තිකයන් සහ අනෙකුත් වෘත්තිකයන් වෙනුවෙන් පෙනී සිට නොමිලේ නීති සහාය ලබා දීමට කටයුතු කරන බවද පොරොන්දු වී සිටියේය.
මේ සෑම හොරකමක්ම දැක දැක අහක බලා සිටින සියලු දෙනාම සමගි ජන බලවේග රජයක් යටතේ අධිකරණය හමුවට ගෙනවිත් නීතිමය ක්‍රියාමාර්ග ගන්නා බවත් ඔහු පැවසීය. බාල බෙහෙත් ලියාපදිංචි කිරීම පිළිබඳ රටේ ජනතාවට තොරතුරු දැන ගැනීමේ අයිතියක් ඇති හෙයින් එම තොරතුරු ජනතාවට ඉදිරිපත් කළ යුතු බවත් යම් හෙයකින් එවැනි තොරතුරු සඟවාගෙන සිටී නම් එම පුද්ගලයන්ට නීතිය හමුවට යෑමට සිදුවන බවත් පැවසූ විපක්ෂ නායකවරයා කියා සිටියේ හිතාමතාම වැරදි කිරීම තුළ සිදුවන සාපරාධි ක්‍රියාවල නිරතවන, දැන දැන බාල ඖෂධ ගෙන එන, මිනිස් ජීවිත අහිමි කරන පුද්ගලයන්ට නිතිය හමුවේ දැඩි දඬුවම් ලබාදීමට කටයුතු කරන බවයි.
රජය මේ වැරදි අඩුපාඩු නිවැරදි කරගත යුතු බවත් එම නිවැරදි විසඳුම් ගන්නා තෙක් විමසිල්ලෙන් සිටින බවත් මෙරට සෞඛ්‍ය පද්ධතියේ බරපතළ කඩා වැටීම ඊළඟ මානව ව්‍යවසනයක් විය හැකි හෙයින් මේ සම්බන්ධයෙන් අවධානය යොමු කළ යුතු බවත් පැවසීය.
තවද ආංශික කාරක සභාවලට අමාත්‍යාංශ නිලධාරීන් පමණක් නොව විවිධ සංගම්වල නියෝජිතයන් ගෙන්වීමේ හැකියාවක් පවතින බවත් ඒ තුළින් සත්‍ය අනාවරණය කර ගත හැකි බවත් විපක්ෂ නායකවරයා පැවසීය.
