නව සභාපතිවරු6 දෙනකුත් එති
අමාත්යාංශ දෙකකට නව ලේකම්වරුන් දෙදෙනකු සහ රාජ්ය ආයතන හයකට නව සභාපතිවරුන් හයදෙනකු පත් කිරීම සඳහා උසස් නිලතල පිළිබඳ පාර්ලිමේන්තු කාරක සභාවේ අනුමැතිය හිමිව ඇත.
ඒ අනුව කාන්තා ළමා කටයුතු හා සමාජ සවිබල ගැන්වීම් අමාත්යාංශයේ නව ලේකම්වරිය ලෙස යමුනා පෙරේරා මහත්මිය ද ජල සම්පාදන සහ වතු යටිතල පහසුකම් සංවර්ධන අමාත්යාංශයේ නව ලේකම්වරයා ලෙස ආර්. එම්. ඩබ්ලිව්. එස්. සමරදිවාකර මහතාගේ පත්වීම ද උසස් නිලතල පිළිබඳ කාරක සභාව අනුමත කර ඇති බව පාර්ලිමේන්තුවේ සහකාර මහ ලේකම් ටිකිරි කේ. ජයතිලක මහතා පවසයි.
මහජන බැංකුවේ සභාපතිවරයා ලෙස සුජීව රාජපක්ෂ මහතාගේ පත්වීමට ද එම කාරක සභා අනුමැතිය ලැබී ඇත.
ශ්රී ලංකා පරමාණුක බලශක්ති මණ්ඩලයේ සභාපතිවරයා වශයෙන් මහාචාර්ය එස්. ආර්. ඩී. රෝසා මහතාගේ පත්වීමට ද ශ්රී ලංකා රාජ්ය ඉංජිනේරු සංස්ථාවේ සභාපතිවරයා ලෙස රත්නසිරි කලුපහන මහතාගේ පත්වීමට ද ඉංජිනේරුමය කාර්යයන් පිළිබඳ මධ්යම උපදේශක කාර්යාංශයේ සභාපතිවරයා ලෙස ඉංජිනේරු ඒ. ගල්කැටිය මහතාගේ පත්වීමට ද ප්රසිද්ධ රැඟුම් පාලක මණ්ඩලයේ සභාපතිවරිය ලෙස ස්ටෙලා මාරපන මහත්මියගේ පත්වීමට ද ශ්රී ලංකා ජාතික ජලජීවී වගා සංවර්ධන අධිකාරියේ සභාපතිවරයා ලෙස ජයන්ත විජේරත්න මහතාගේ පත්වීමට ද උසස් නිලතල පිළිබඳ කාරක සභාවේ අනුමැතිය හිමිව ඇත.
උපාලි ද සේරම්