බදු හා සම්බන්ධ සියලු කටයුතු වඩාත් නිවැරදි හා කාර්යක්ෂම ආකාරයෙන් සිදුකිරීමේ අරමුණින් ක්‍රියාත්මක කෙරෙන බදු හා සම්බන්ධ කටයුතු විද්‍යුත්කරණය කිරීමේ රැමිස් ව්‍යාපෘතිය ලබන මාසයේ (දෙසැම්බර්) සිට ක්‍රියාත්මක කරන බව මුදල් රාජ්‍ය අමාත්‍ය සහ වැවිලි ව්‍යවසාය අමාත්‍ය ආචාර්ය රංජිත් සියඹලාපිටිය මහතා පවසයි.
මෙම ව්‍යාපෘතිය 2013 වසරේදී ආරම්භ කළ ද, මේ හා සම්බන්ධ පනත් වරින්වර සංශෝධනය වීම, ව්‍යාපෘතිය නිම කිරීමට අවශ්‍ය අරමුදල් නොමැතිවීම වැනි කරුණු හේතුවෙන් ව්‍යාපෘතිය නිම කිරීමට දීර්ඝ කාලයක් ගත වුවද මේ වන විට එහි සියලු කටයුතු නිමවෙමින් පවතින බව ද ඇමැතිවරයා සඳහන් කරයි.
මේ වන විට රටේ ඇත්තේ එක් එක් පුද්ගලයන් හා ආයතන ලබාදෙන දත්ත මත පදනම්ව බදු අයකිරීමේ ක්‍රමවේදයක් බව සඳහන් කළ ඇමැතිවරයා නව විද්‍යුත් ක්‍රමවේදය මගින් නිශ්චිත හා නිවැරදි දත්ත විද්‍යුත් ක්‍රමවේදයකට අනුව ගබඩා වීම තුළින් වඩාත් සාධාරණ හා නිවැරදි බදු ක්‍රමයක් ඇති වන බව කියයි.
මෙම නව ක්‍රමවේදය මගින් දේශීය ආදායම් දෙපාර්තමේන්තුව සමග රේගුව, සුරාබදු දෙපාර්තමේන්තුව, සමාගම් රෙජිස්ට්‍රාර් දෙපාර්තමේන්තුව, ඉඩම් ලියාපදිංචි කිරීමේ දෙපාර්තමේන්තුව ආදී ආයතන එකිනෙක සම්බන්ධවීම මෙන්ම දේශීය ආදායම් දෙපාර්තමේන්තුව හා බදු ගෙවන්නන් මාර්ග ගත ක්‍රමය ඔස්සේ සම්බන්ධ වීම හේතුවෙන් වැරදි සිදුවීම අවම වීමත්, බදු ගෙවන්නන්ට අවශ්‍ය තොරතුරු වහාම විද්‍යුත් ක්‍රමවේදයට අනුව මාර්ගගත ක්‍රමය ඔස්සේ ලබාගැනීමට අවස්ථාව සැලසීමත් සිදුවන බවද අමාත්‍යවරයා සඳහන් කරයි. ලෝකයේ හැම රටක්ම පාහේ ඔවුන්ගේ ආදායම් පද්ධතිය දියුණු කරගෙන තිබෙන්නේ විද්‍යුත් තාක්ෂණය ඒ සඳහා යොදාගැනීමෙන් බවද අමාත්‍යවරයා වැඩිදුරටත් සඳහන් කරයි.
ශ්‍යාම් නුවන් ගනේවත්ත
