රුසියාව විසින් යුක්රේනය ආක‍්‍රමණය කිරීම ඇරඹූ ඉකුත් පෙබරවාරි 24 වැනිදා සිට මේ දක්වා වූ කාලයේදී සිවිල් වැසියන් 37 දෙනකු මිය ගොස් තවත් 50 දෙනකු තුවාල ලබා ඇති බව එක්සත් ජාතීන්ගේ ළමා අරමුදල හෙවත් යුනිසෙෆ් ආයතනය විසින් නිවේදනය කර තිබේ. එම සංවිධානයට අනුව පෙරේදා (09දා ) වන විට යුක්රේන ජාතිකයන් විසි ලක්ෂයක් පමණ දෙනා සරණාගතයන් වශයෙන් වෙනත් රටවලට පලා ගොස් ඇති අතර එම පිරිසෙන් දස ලක්ෂයක් දෙනා කුඩා ළමුන්ය.
මේ අතර යුක්රේනයේ ‘ඉන්ටර්ෆැක්ස්’ ප‍්‍රවෘත්ති ආයතනය පවසා ඇත්තේ මේ වන විට සටන් පවතින ප‍්‍රදේශවලින් සිවිල් වැසියන් 48,000ක් පමණ දෙනා ‘මානුෂීය කොරිඩෝව’ වැඩපිළිවෙළ යටතේ ඉවත් කරගෙන ඇති බවයි. ජාත්‍යන්තර රතු කුරුස සංවිධානය විසින් නිවේදනයක් නිකුත් කරමින් පවසා ඇත්තේ රුසියානු ආක‍්‍රමණය හේතුවෙන් යුක්රේනය පුරා නිවාස රැසක් විනාශ වී ගොස් ඇති අතර සිය දහස් ගණනක් වන ජනතාවට, ආහාර හා උෂ්ණත්ව උපකරණ, විදුලිය හා වෛද්‍යාධාර නොමැති බවයි.
සංස්කරණය
ඒමන්ති මාරඹේ
