සීගිරිය බලකොටුවක් නොව, උද්‍යානයක් බවට පර්යේෂණවලින් තහවුරු වී ඇතැයි සංචාරක අමාත්‍යාංශයේ ලේකම් චූලානන්ද පෙරේරා මහතා මහනුවර දී පැවසීය. සංචාරක මධ්‍යස්ථානයක් ලෙස සීගිරිය පිළිබඳ මුළු ලෝකය ම දන්නා මුත් සීගිරිය පිළිබඳ හරි දේ ලෝකයට ගොස් නැතැයි ද ඒ මහතා කීය.
සීගිරිය ලෝක පූජිත සංචාරක සහ සංස්කෘතික මධ්‍යස්ථානයක් ලෙස නම්කර තිබුණත් මෙය හරි තැනට දැමිය යුත්තේ කෙලෙස ද යන්න සම්බන්ධයෙන් යුනිසෙෆ් සංවිධානයේ නිලධාරීන් හා සංස්කෘතික හා පුරාවිද්‍යා දෙපාර්තමේන්තු නිලධාරීන් එක්ව කළ සාකච්ඡා ධනාත්මකව සිදු වූ බව ද සංචාරක අමාත්‍යාංශ ලේකම්වරයා කියා සිටියේය.
සීගිරිය බලකොටුවක් යැයි සිතාගෙන හැම දෙනාම සීගිරිය නැරඹීමට යන බව පැවසූ ඒ මහතා සීගිරිය බලකොටුවක් වූවා නම් ලස්සන පොකුණු, ලස්සන මල්වතු තනා ඇත්තේ මන්දැයි විමසා සිටියේය.
ඇත්තට ම සීගිරිය බලකොටුවක් නොවන බවත්, සීගිරිය ලස්සන ලෙෂර් පාර්ක් එකක් බවත් පැවසූ ඒ මහතා පේරාදෙණිය වගේ ලස්සනට විවේකයෙන් ඉන්න ඒ කාලේ මෙය ඉදිකර ඇතැයි ද ඒ මහතා පැවසීය. මෙය රජතුමා විසින් හදපු ලෙෂර් පාර්ක් එකක් බවට හමු වූ සම්පූර්ණ සාධකවලින් සනාථ වී ඇතැයි ද සංචාරක අමාත්‍යාංශයේ ලේකම් චූලානන්ද පෙරේරා මහතා පැවසීය.
ඒ අනුව මෙරටට පැමිණෙන විදෙස් සංචාරකයන් සඳහා ඉදිරියේදී නව මෘදුකාංගයක් හඳුන්වාදීමට බලාපොරොත්තු වන බව ද ඒ මහතා තවදුරටත් සඳහන් කළේය.
