සහල් මෝල් හිමියන්ට සහ මහා පරිමාණ වී ගබඩා හිමියන්ට ඉදිරියේදී එම ආහාර තොග රැස්කර තබාගැනීමට නොහැකි වන ලෙස පාලනය වන පරිදි රජය විසින් නව නීති සම්පාදනය කරන බව අගමැති රනිල් වික්‍රමසිංහ මහතා පැවසීය.
සහල් මෝල් හිමියන් මුහුණදෙන මූල්‍ය ගැටලු සම්බන්ධයෙන් සාකච්ඡා කිරීම සඳහා ඊයේ (15දා) අග්‍රමාත්‍ය කාර්යාලයේදී පැවැති සාකච්ඡාවේදී අගමැතිවරයා මේ බව කීවේය.
සහල් මෝල් හිමියන් ඉල්ලා සිටින ණය පහසුකම් ප්‍රමාණවත් පරිදි ලබානොදීම මෙන්ම සහල් තොග සඟවාගැනීම් ද සිදුවන බව වෙළෙඳ, වාණිජ හා ආහාර සුරක්ෂිතතා ඇමැති නලින් ප්‍රනාන්දු මහතා මෙහිදී අග්‍රාමාත්‍යවරයා දැනුවත් කළේය.
මේ අනුව ණය ලබාදීමේදී රජයේ මූල්‍ය ප්‍රතිපත්තිවලට අනුකූලව ණය ලබාදීමට කටයුතු කරන ලෙස රාජ්‍ය බැංකුවලට දැනුම්දුන් අගමැතිවරයා ණය ලබා දීමේ ප්‍රතිපත්ති නිරීක්‍ෂණය කරන ලෙස ශ්‍රී ලංකා මහ බැංකුවට සහ මහා භාණ්ඩාගාර නිලධාරීන්ට ද දැනුම් දුන්නේය.
මේ සාකච්ඡාවට ශ්‍රී ලංකා මහ බැංකුවේ හා මහා භාණ්ඩාගාරයේ නිලධාරීහු සහ රාජ්‍ය බැංකු හා වාණිජ බැංකුවල උසස් නිලධාරීහු ද සහභාගි වූහ.
ශ්‍යාම් නුවන් ගනේවත්ත
