ශ්‍රී ලංකාවට යළි ඉන්දීය හමුදාව ගෙන එන ආකාරයේ පසුබිමක් නිර්මාණය නොකරන ලෙස තමන් ශ්‍රී ලංකා රජයට දැනුම් දෙන බව දෙමළ ජනතා සන්ධානයේ නායක සී.වී. විග්නේෂ්වරන් මන්ත්‍රීවරයා 4 දා යාපනයේ මාධ්‍ය හමුවකට සහභාගි වෙමින් පැවසීය.
මන්ත්‍රීවරයා මේ බව පැවසුවේ දේශීය හා විදේශීය මාධ්‍ය කීපයක් වෙත අදහස් දක්වමිනි.
13 වෙනි ආණ්ඩුක්‍රම ව්‍යවස්ථා සංශෝධනය පෙරදැරි කරගෙන උතුරු නැගෙනහිර ප්‍රශ්නය විසඳීමට යෑමේ ප්‍රතිඵල භයානක බව කී විග්නේෂ්වරන් මන්ත්‍රීවරයා යම් අරගලකාරී තත්ත්වයක් ඇති වුවහොත් ඉන්දියාවට සිය හමුදාව යළිත් උතුරු නැගෙනහිර පළාත්වල ස්ථාපිත කිරීමට බලයක් හා අවස්ථාවක් හිමි වන බවද කියා සිටියේය.
ඉන්දීය හමුදාව උතුරු නැගෙනහිර පළාත්වලට යළි පැමිණියහොත් ඔවුන් ආපසු යැවීම පහසු නොවන බව කී මන්ත්‍රීවරයා ශ්‍රී ලංකාව තුළ වෙනත් විදේශිකයන්ගේ ක්‍රියාකාරකම් තීව්‍ර වී ඇති බව දැනගතහොත් ඔවුන්ට ආපසු යෑමට අවශ්‍යතාවක් නොවන බවද සඳහන් කළේය.
1983 දී ශ්‍රී ලංකාවේ ඇති වූ අන්දමේ ජාතිවාදී කෝලාහලයක් යළි ඇති වනු ඇතැයි තමන් විශ්වාස නොකරන නමුත් 13 වෙනි සංශෝධනයට අනුව බලය බෙදීමේ හෝ බලය විමධ්‍යගත කිරීමේ ක්‍රියාවලියක් ක්‍රියාවට නැංවීමට උත්සාහ කළහොත් රට තුළ යම් විනාශකාරී හා ප්‍රකෝපකාරී ක්‍රියාදාමයක් සිදු විය හැකි බව දැනටමත් පෙනෙන්නට ඇතැයිද විග්නේෂ්වරන් මන්ත්‍රීවරයා මෙම මාධ්‍ය හමුවේදී කියා සිටියේය.
දිනසේන රතුගමගේ
